ရွှေတုံး၊ ရွှေခဲများရောင်းဝယ်ရာတွင် အာဏာသိမ်းစစ်ကောင်စီကခွင့်ပြုထားသောဘဏ်ဖြင့်သာ ချိတ်ဆက်ရောင်းဝယ်ရန် စစ်ကောင်စီဗဟိုဘဏ်က စီစဉ်နေကြောင်း ရွှေလုပ်ငန်းရှင်များကပြောသည်။
စစ်ကောင်စီခန့် ဗဟိုဘဏ်ဥက္ကဌ နှင့် ရွှေလုပ်ငန်းရှင်များရွှေနှင့်ငွေကြေးဈေးကွက် တည်ငြိမ် ခိုင်မာစေရန်ဆိုကာယမန့်နေ့ (စက်တင်ဘာ ၁၄ရက်)က တွေ့ဆုံဆွေးနွေးခဲ့ခြင်းဖြစ်သည်။
စစ်ကောင်စီဗဟိုဘဏ်နှင့် စစ်ကောင်စီလက်အောက်ခံ ဝန်ကြီးဌာနများက ရွှေနှင့် ငွေကြေးဈေးကွက်တည်ငြိမ်အောင် ဆောင်ရွက်မည်ဖြစ်၍ ရွှေလုပ်ငန်းရှင်များ ပူးပေါင်းဆောင်ရွက်ရမည်ဟု ဖိအားပေးထားကြောင်းသိရသည်။
သို့သော်အသေးစိပ်ကို စစ်ကောင်စီနှင့်ရွှေလုပ်ငန်းရှင်များဘက်က တရားဝင်ထုတ်ပြန်ခြင်းမရှိသေးပေ။
ယနေ့ (စက်တင်ဘာ ၁၅)တွင် ပြင်ပပေါက်ဈေး၌ ရွှေတစ်ကျပ်သားကို ကျပ် သိန်း ၃၀ခန့်ပေါက်ဈေးရှိပြီး ရန်ကုန်တိုင်း ရွှေလုပ်ငန်းရှင်များအသင်းက အခေါက်ရွှေတစ်ကျပ်သားကို ကျပ် ၁၉ သိန်းကျော်( ၁,၉၈၂,၀၀၀)သာဈေးဖွင့်ထားသည်။
“ကျွန်တော်တို့ကြားတာတော့ဦးကျော်ဝင်း (ရွှေသံလွင် ဦးကျော်ဝင်း )ပိုင်တဲ့ ရွှေဘဏ်ကပဲ ရွှေအရောင်းအဝယ်လုပ်ခွင့်ရှိတယ်လို့ပြောတယ်”ဟု ရွှေလုပ်ငန်းရှင်တစ်ဦးကပြောသည်။
စစ်ကောင်စီထိန်းချုပ်ထားသည့် ဗဟိုဘဏ်ကကျပ်ငွေသိန်း ၂၀၀ နှင့် အထက်ရွှေ၊အိမ်ခြံမြေနှင့်ကားရောင်းဝယ်မှုများကို ဘဏ်စနစ်ဖြင့်ပေးချေရမည်ဟု ယမန့်နှစ်က ကန့်သတ်ထားသည်။
