စစ်ကိုင်းတိုင်း၊ မြင်းမူမြို့ပေါ်တွင် ခြင်းခတ်နေသော စစ်ကောင်စီတပ်အား ဗုံးပစ်တိုက်ခိုက်ရာ စစ်ကောင်စီတပ်ဘက်က အထိအခိုက်များပြီး ညတွင်းချင်းသင်္ဂြိုလ်ခဲ့ကြောင်း သတင်းရရှိသည်။
ယမန်နေ့ (စက်တင်ဘာ ၁၅ ရက်) ညနေ ၅နာရီခန့်က မြင်းမူမြို့နယ်၊ စာသင်ကျောင်းတွင် တပ်စွဲထားသောစစ်ကောင်စီတပ်များ ပိုက်ကျော်ခြင်းခတ်နေချိန် လျက်ဆားပုလင်း(ဗုံး)နှင့် ပစ်ခတ်တိုက်ခိုက်ခဲ့ရာ အနည်းဆုံး စစ်သား ၇ ဦးထက်မနည်း သေဆုံးသွားကြောင်း ZERO ပြောက်ကျားတပ်ဖွဲ့(မြင်းခြံ)က သတင်းထုတ်ပြန်သည်။
စာသင်ကျောင်းတွင် တပ်စွဲထားသော စစ်ကောင် စီတပ်သည် ပုံမှန်အင်အား ၃၀ ခန့်ရှိကြောင်း၊ မကြာခဏအင်အားအတိုးအလျှော့ ပြုလုပ်လေ့ရှိကြောင်း ZERO ပြောက်ကျားတပ်ဖွဲ့(မြင်းခြံ) ခေါင်းဆောင် ကိုသက်ကြီးက ပြောသည်။
“ချောင်းနေတာတော့ကြာပြီ။ မနေ့ကညနေ ငါးနာရီမှာတော့ ကလေး(ရဲဘော်)နှစ်ယောက်ကသွားပြီးတော့ ပိုက်ကျော်ခြင်းခတ်နေတဲ့နေရာမှာ ကင်းပုန်းတွေလည်းရှိတယ်ဗျ။ လျက်ဆားပုလင်းနဲ့ပစ်ခဲ့တယ်။ လျက်ဆားပုလင်းက ပစ်မှတ်ကို ထိထိရောက်ရောက် ပစ်နိုင်ပြီးနောက် ကလေးတွေလည်း ပြန်ဆုတ်လာတယ်။ ကလေးတွေလည်း အန္တရာယ်ကင်းတယ်။ သေနတ်တွေနဲ့ပစ်တာတွေလိုက်ဖောက်တာတွေလုပ်တယ်။ ညနေပိုင်းမှာတော့ မြင်းမူမြို့မှာရှိတဲ့ မြောက်သုဿန်မှာ ညဘက်မှာ သွားသင်္ဂြိုလ်တယ်လို့သိရတယ်။”ဟု ၎င်းက ပြောသည်။
အဆိုပါ တိုက်ခိုက်မှုအား ZERO ပြောက်ကျားတပ် ဖွဲ့(မြင်းခြံ)နှင့် True Fighter အဖွဲ့တို့က ပူးပေါင်းဆောင်ရွက်ခဲ့ကြောင်း ၎င်းတို့က အသိပေးသည်။
မြင်းမူမြို့နယ်သည် စစ်ကောင်စီတပ်အား ခုခံတော်လှန်တိုက်ခိုက်မှုအားကောင်းရာဒေသတစ်ခုဖြစ်ပြီး ပြီးခဲ့သည့်ရက်ပိုင်းအတွင်းကလည်း မြင်းမူနှင့် ငါန်းဇွန်ကြား ရေလယ်သောင်ရွာရှိ စစ်တပ်နှင့်ပျူများအား ဒေသတွင်းအဖွဲ့များ ပူးပေါင်းကာ တိုက်ခိုက်ခဲ့သေးသည်။