အကြမ်းဖက်စစ်ကောင်စီတပ်က မိုးဗြဲမြို့သို့ တာဝေးပစ်လက်နက်ကြီးများဖြင့် ရမ်းသမ်းပစ်ခတ်နေသောကြောင့် ပြည်သူများအနေဖြင့် လုံခြုံစိတ်ချရသည့်နေရာတွင် နေထိုင်ရန် မိုးဗြဲပြည်သူ့ကာကွယ်ရေးတပ်(MBPDFက အရေးပေါ်သတိပေးချက် ထုတ်ပြန် သည်။
ယနေ့(စက်တင်ဘာ ၁၈ ရက်) ညနေပိုင်းကစ၍စစ်ကောင်စီတပ်က တိုက်ပွဲဖြစ်ပွား ခြင်းမရှိဘဲ တစ်ဖက်သတ် ပစ်ခတ်မှုဟု မိုးဗြဲမြို့စစ်ရေးသတင်းရင်းမြစ်က ဆိုသည်။
“စခ တပ်တွေက မိုးဗြဲမြို့ကိုဝင်ဖို့ ကြိုးစားနေ တုန်းပဲ။ဒါပေမယ့် အခုက တိုက်ပွဲမဖြစ်ဘဲနဲ့ကိုလူနေရပ်ကွက်တွေထဲ လက်နက်ကြီးနဲ့ပစ်နေတာ”ဟု ၎င်းက ပြောသည်။
စစ်ကောင်စီ၏ လက်နက်ကြီးကျည်များမှာ မိုးဗြဲ မြို့အနောက်ဘက်ရှိ ရပ်ကွက်တစ်ခုအတွင်းသို့ ကျရောက်ခဲ့ကြောင်း လည်း Mobye Resue Team တာဝန်ရှိသူက အတည်ပြုသည်။
“လက်နက်ကြီး နှစ်လုံးကျတယ်။ လူထိုခိုက်မှုရှိ၊မရှိ ကျွန်တော်တို့ စုံစမ်းလိုက်တော့ အထိအခိုက် မရှိဘူးလို့ သိရတယ်”ဟု ၎င်းက ရှင်းပြသည်။
သို့သော်ယခုလ ၁၆ ရက်ကရစစ်ကောင်စီ၏ လက်နက်ကြီးဖြင့် ရည်ရွယ်ချက်ရှိရှိ ပစ်ခတ်မှုကြောင့် မိုးဗြဲမြို့ မွေတော်ဘုရားကျောင်းတွင် စစ်ဘေးရှောင် ခှိုလှုံသောအပြစ်မဲ့ ပြည်သူ ၁၃ ဦး လက်နက်ကြီးထိမှန်ကာ အသက် ၁၀ နှစ်အောက် မောင်နှမ နှစ်ဦးနှင့် အသက် ၅၀ကျော် အမျိုးသား နှစ်ဦး သေဆုံးခဲ့ရသည်။
ကရင်နီ(ကယား)ပြည်နယ်၏ စစ်ရေးအရအရေးပါသော မိုးဗြဲမြို့ကို ထိန်းချုပ်ရန် စစ်ကောင်စီတပ်က ယခုလ ဒုတိယပတ်ကစ၍ ကြိုးပမ်းခဲ့သည်။
ယခုလ ၈ ရက်ကစ၍ အင်အား ၁၀၀ကျော်ပါ စစ်ကောင်စီတပ်သည် မိုးဗြဲမြို့တွင် တပ်စွဲရန် ကြိုးပမ်းလာခြင်းကြောင့် ကရင်နီပူးပေါင်းတပ် များက ခုခံတိုက်ခိုက်ခဲ့သည်။
ထို့နောက် နေ့စဥ်တိုက်ပွဲများပြင်းထန်ခဲ့ပြီး စက်တင်ဘာ ၁၂ ရက်တွင် စစ်ကောင်စီတပ်စွဲထားသည့်နေရာကို ကရင်နီပူးပေါင်းတပ်နယ်မြေရှင်းလင်းနိုင်ခဲ့သည်။
အဆိုပါ ၅ ရက်တာ တိုက်ပွဲအတွင်း စစ်ကောင်စီတပ်ထံမှ MA1 – ၃ လက်၊ MA2 – ၃ လက်၊ MA3 – ၆ လက်၊ ငါးကြင်းမှီး – ၁ လက် အပါအဝင်လက်နက်ကြီးကျည်များအပါအဝင် ခဲယမ်းများသိမ်းဆည်းရရှိခဲ့သည်။
ထို့အပြင် စစ်ကောင်စီတပ်သား ၆၀ဦးထက်မနည်းသေဆုံးခဲ့ကာ အများအပြားဒဏ်ရာရရှိခဲ့ပြီး ကရင်နီပူးပေါင်းတပ်မှ ရဲဘော်နှစ်ဦး ကျဆုံးခဲ့သည်။
