မန္တလေးတိုင်း၊ စဉ့်ကူးမြို့နယ် ရုံးပင်ချပ်ကျေးရွာတွင် စစ်ကောင်စီခန့်ကျေးရွာအုပ်ချုပ်ရေးမှူးထောင်ထားသည့် လောင်းကစားဝိုင်း ရပ်တန်းကရပ်ရန် စဉ့်ကူးမြို့နယ် သမန်းကျားပြောက်ကျားတပ်ဖွဲ့က သတိပေးလိုက်သည်။
စဉ့်ကူးမြို့နယ်၊ ရုံးပင်ချပ်ကျေးရွာရှိ စစ်ကောင်စီခန့် အုပ်ကြီးဦးလှအုန်းနှင့် ၎င်း၏ဇနီးဒေါ်ကြူသည် စစ်ကောင်စီတပ်နှင့် ရဲများအားဆက်ကြေးပေးပြီး လောင်းကစားဝိုင်းပြုလုပ်နေကြောင်း၊ အဆိုပါလောင်းကစားဝိုင်းများအား ရပ်တန့်ရန် ပထမအကြိမ် သတိပေးလိုက်ကြောင်း သမန်းကျားပြောက်ကျား တပ်ဖွဲ့က စက်တင်ဘာ ၁၉ ရက်တွင် ထုတ်ပြန်သတိပေးသည်။
ထုတ်ပြန်ချက်နှင့်ပတ်သက်၍ သမန်းကျားပြောက်ကျားတပ်ဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
စစ်တပ်က အဓမ္မအာဏာသိမ်းပြီးနောက်ပိုင်း မန္တလေးတိုင်းအတွင်း လောင်းကစားဝိုင်းများ ပိုမိုများ ပြားလာပြီး ဒေသတွင်းပြည်သူ့ကာကွယ်ရေးအဖွဲ့များက အဆိုပါလောင်းကစားဝိုင်းများ ရပ်တန့်ရန် သတိပေးထားသည်။
သမန်းကျားပြောက်ကျားတပ်ဖွဲ့သည် ပြီးခဲ့သည့်ရက်ပိုင်းအတွင်းကလည်း စစ်ကောင်စီတပ်အား စီစီတီဗွီကင်မရာမှတ်တမ်းများအား စစ်တပ်ထံသတင်းပေးပို့နေသော စဉ့်ကူးမြို့နယ်ရှိ တန်ပိုဂိတ် များအား ပိတ်သိမ်းရန် သတိပေးထားသည်။
