ရှမ်းပြည်နယ် ကျေးသီးမြို့နယ် မိုင်းရဲကျေးရွှာအုပ်စု တွင် ရှမ်းပြည်တိုးတက်ရေးပါတီ(SSPP)နှင့် ရှမ်းပြည်ပြန်လည်ထူထောင်ရေးကောင်စီ(RCSS)တို့ ယနေ့ နံနက်က တိုက်ပွဲဖြစ်ပွားခဲ့ကြောင်း SSPPက သတင်းထုတ်ပြန်သည်။
မိုင်းရဲကျေးရွှာအုပ်စု ပန်ဟိုက်ကျေးရွှာအနီးရှိ နမ့်တောင်းချောင်းကူးတံတားအနီး၌ အခြေချလုပ်ရှားနေသည့် SSPP တပ်ကို RCSS က ယနေ့(စက်တင်ဘာ ၂၁ရက်) နံနက်အစောပိုင်း၌ လာရောက်ချောင်းမြောင်း တိုက်ခိုက်ခဲ့ကြောင်း ဖော်ပြထားသည်။
လဲချား – မိုင်းနောင် ကားလမ်းအရှေ့ဘက်၌ လုပ်ရှားနေသည့် RCSSတပ်ဖွဲ့သည် SSPP လှုပ်ရှားနေသည့် ကားလမ်းအနောက်ဘက်သို့ အင်အား ၂၀ခန့်ဖြင့် ဝင်ရောက် တိုက်ခိုက်ခဲ့ခြင်းဖြစ်သည်ဟု ဆိုသည်။
မိနစ် ၂၀ ခန့်ထိတွေ့တိုက်ပွဲဖြစ်ပွားမှုအတွင်း ထိခိုက်သေဆုံးမှုမရှိဘဲ RCSSတပ်များ ပြန်လည်ဆုတ်ခွာသွားသည်ဟု ထုတ်ပြန်သည်။
SSPPသည် ပြီးခဲ့သည့် စက်တင်ဘာ ၁၇ရက်နှင့် ၂၀ရက်က ကလည်း မိုးမိတ်မြို့နယ် ဟွေခမ်းတောင်၌ စစ်ကောင်စီတပ်နှင့် တိုက်ပွဲဖြစ်ပွားခဲ့ကြောင်း၊ စစ်ကောင်စီနှင့် SSPPတို့ မိုးမိတ်၌ စစ်ရေးတင်းမာနေချိန် RCSSက SSPPကို လာရောက်ပစ်ခတ်ခြင်းဖြစ်ကြောင်း ဖော်ပြထားသည်။
ရှမ်းလက်နက်ကိုင်တပ်များဖြစ်သည့် SSPP နှင့် RCSSတို့သည် အာဏာသိမ်းစစ်ကောင်စီတပ်နှင့် ဆွေးနွေးနေသည့် လက်နက်ကိုင်တပ်များဖြစ်ပြီး SSPP အနေဖြင့် ၀၊ မိုင်းလား လက်နက်ကိုင်များနှင့် ပူးပေါင်းပြီး စစ်ကောင်စီနှင့် နေပြည်တော်၌ တွေ့ဆုံဆွေးနွေးရန်ရှိကြောင်း ၎င်းတို့၏ မဟာမိတ်ဖြစ်သည့် ရက္ခိုင့်တပ်တော်(AA) ဒုစစ်ဦးစီးချုပ် ဒေါက်တာညိုထွန်းအောင်က စက်တင်ဘာ ၁၉ရက်တွင် ပြောဆိုထားသည်။
SSPP သည် ယခင်ကလည်း စစ်ကောင်စီခေါင်းဆောင်နှင့် သွားရောက်တွေ့ဆုံခဲ့ဖူးပြီး ယင်းတွေ့ဆုံမှုမတိုင်မီ စစ်ကောင်စီတပ်နှင့် စစ်ရေးတင်းမာနေသည့် သတင်းများ ထုတ်ပြန်ခဲ့ပြီး ယခုလည်း တိုက်ပွဲသတင်းများ၊ စစ်ရေးတင်းမာမှုသတင်းများ ထုတ်ပြန်လျက်ရှိသည်။
