ဥရောပသမဂ္ဂ(EU)သည် မြန်မာစစ်တပ်၏ လက်နက်ပွဲစားများကို ချက်ချင်းအရေးယူပိတ်ဆို့ရန် Justice For Myanmar က တောင်းဆိုလိုက်သည်။
မြန်မာနိုင်ငံအပေါ် အီးယူ၏ နောက်ဆုံးအကြိမ်အရေးယူပိတ်ဆို့မှုမှာ ၇ လကျော်ရှိလာခဲ့ပြီး တရားမဝင်စစ်ကောင်စီ၏ အကြမ်းဖက်လုပ်ရက်များသည် ဆင်ခြင်မှုမရှိသော လေကြောင်းတိုက်ခိုက်မှုများ၊ လက်နက်ကြီးပစ်ခတ်မှုများ၊ နိုင်ငံရေးအကျဥ်းသားများကို ကွပ်မျက်မှုများနှင့် ကျောင်းသားကလေးငယ်များကို သတ်ဖြတ်ခြင်းတို့ကို ပိုမိုပြင်းထန်စွာလုပ်ဆောင်လာကြောင်း JFM က ယနေ့ထုတ်ပြန်သည်။
ပြီးခဲ့သည့်သီတင်းပတ်က အနည်းဆုံးကျောင်းသားကလေးငယ် ၁၁ ဦးကို သတ်ဖြတ်ခဲ့မှုသည် ယခင်နှစ် ဖေဖော်ဝါရီတွင် မြန်မာစစ်တပ်၏ အာဏာသိမ်းရန်ကြိုးပမ်းမှုစတင်ချိန်ကစ၍ တိုက်ခိုက်မှုတစ်ခုအတွင်း ကလေးငယ်များကို သတ်ဖြတ်မှု အမြင့်မားဆုံးမှတ်တမ်းဖြစ်ခဲ့ကြောင်း JFM ကဆိုသည်။
မြန်မာစစ်ကောင်စီ၏ ဆက်လက်ကျူးလွန်နေဆဲ ရက်စက်ကြမ်းကြုတ်သည့်ရာဇ၀တ်မှုများမှာ အီးယူအပါအ၀င် နိုင်ငံများထံမှ ငွေကြေးများ၊ လက်နက်များ၊ ဆက်စပ်ပစ္စည်းများကို ရရှိနေခြင်းကြောင့် ဖြစ်ပေါ်နေခြင်းဟု JFM က ပြောသည်။
JFM သည် စစ်အာဏာသိမ်းကြိုးပမ်းမှုနောက်ပိုင်း မြန်မာစစ်တပ်ကို ငွေကြေး၊ လက်နက်များကို အထောက်အပံ့ပြုနေသည့် ကုမ္ပဏီ ၃၁ ခုကို အရေးယူပိတ်ဆို့ရန် ဖော်ထုတ်ထားသည်။
လက်ရှိအချိန်အထိ အီးယူသည် အဆိုပါ ကုမ္ပဏီ ၃၁ ခုအနက် Htoo Group of Companies တစ်ခုကိုသာ အရေးယူပိတ်ဆို့ထားသည်။
အီးယူနှင့်ပတ်သက်ဆက်နွယ်နေသည့် ကုမ္ပဏီငါးခုစာရင်းကို JFM က ဖော်ထုတ်ခဲ့ပြီး အရေးပေါ်ဒဏ်ခတ်ပိတ်ဆို့ရန်တောင်းဆိုသည်။ အဆိုပါ ကုမ္ပဏီငါးခုမှာ Dynasty Group နှင့် လက်အောက်ခံကုမ္ပဏီများ၊ KT Group ၊ Ky-Tha Group နှင့် လက်အောက်ခံကုမ္ပဏီများ၊ Mega Hill General Trading ၊ Miya Win International နှင့် Myanmar Chemical & Machinery(MCM) တို့ ဖြစ်သည်။
