မလိုက်နာပါက ပြည်သူ့တရားစီရင်ရေးနှင့်အညီ အရေးယူမည်ဟု သတိပေး
စစ်ကိုင်းတိုင်း ကန့်ဘလူမြို့နယ်အတွင်း အကြမ်းဖက်စစ်ကောင်စီ လက်အောက်တွင် တာဝန်ထမ်း ဆောင်လျက်ရှိသည့် ဌာနဆိုင်ရာ အသီးသီးမှ Non CDMဝန်ထမ်းများ အလင်းဝင်ကြရန် ကန့်ဘလူမြို့နယ် ပြည်သူ့အုပ်ချုပ်ရေးအဖွဲ့(ပအဖ)က ယနေ့ (စက်တင်ဘာ ၂၄ရက်) ကြေညာချက် ထုတ်ပြန်သည်။
Non CDM ဝန်ထမ်းများသည် အမျိုးသာညီညွတ်ရေးအစိုးရထံ ပူးပေါင်းခြင်း၊ ပြည်သူ့ရင်ခွင် ခိုလှုံခြင်း ၊ တော်လှန်ရေးအင်အားစုများနှင့် လက်တွဲခြင်း မပြုဘဲ စစ်ကောင်စီ အလိုကျ တာဝန်ထမ်းဆောင်နေခြင်းများ ရှိနေဆဲဖြစ်ကြောင်း၊ ထိုသို့ တာဝန်ထမ်းဆောင်နေခြင်းသည် ပြည်သူလူထုအား အနိုင်ကျင့် နှိပ်စက်ရန် အားပေးကူညီခြင်းဖြစ်ကြောင်း ဖော်ပြထားသည်။
ထို့ကြောင့် ဆက်လက် တာဝန်ထမ်းဆောင်ခြင်းမပြုဘဲ ပြည်သူ့ထံသို့ အလင်းဝင်ရောက်ရန် ယခု အမိန့်ကြေညာချက်ဖြင့် အသိပေးလိုက်ကြောင်း ၊ ကြေညာချက်အား လိုက်နာဆောင်ရွက်ခြင်းမရှိပါက ပြည်သူ့ တရားစီရင်ရေး ၏ လုပ်ထုံးလုပ်နည်းများ နှင့်အညီ ပြင်းထန်စွာ အရေးယူ ဆောင်ရွက်သွားမည်ဖြစ်ကြောင်း ထုတ်ပြန်ထားသည်။
စစ်ကိုင်းတိုင်းရှိ အခြားမြို့နယ်များတွင်လည်း Non CDM ဝန်ထမ်းများ အမြန်ဆုံးအလင်းဝင်ရန် သက်ဆိုင်ရာ မြို့နယ် ပြည်သူ့ကာကွယ်ရေးတပ်၊ ပြည်သူ့အုပ်ချုပ်ရေးအဖွဲ့များက ကြေညာချက်ထုတ်ပြန်ထားသည်။
