ကရင်အမျိုးသားအစည်းအရုံး(KNU) တပ်မဟာ (၅)နယ်မြေ ဖာပွန်ခရိုင်တွင် ယမန်နေ့က တိုက်ပွဲဆက်လက်ဖြစ်ပွားခဲ့ပြီး စစ်ကောင်စီတပ်နှင့် ၎င်း၏ လက်အောက်ခံနယ်ခြားစောင့်တပ်(BGF)တပ်ဖွဲ့ဝင်များ သေဆုံးထိခိုက်ရှိခဲ့ကြောင်း တပ်မဟာ(၅)က ယနေ့ သတင်းထုတ်ပြန်သည်။
စက်တင်ဘာ ၂၄ရက်က ဒွယ်လိုးမြို့နယ် ဝါးဒူးကျေးရွာနှင့် ထိုးဖိုရွာကြားတွင် စစ်ကောင်စီ လက်ပါးစေ BGFနှင့် ရင်ဆိုင်တိုက်ပွဲဖြစ်ခဲ့ရာ စစ်ကောင်စီတပ်၏ စစ်သုံးထောက်ပို့ကား တစ်စီး ဖျက်ဆီးနိုင်ခဲ့ပြီး စစ်ကောင်စီတပ်သားနှစ်ဦးကို သုတ်သင်နိုင်ခဲ့ကြောင်း ဖော်ပြထားသည်။
ထို့အတူ ဖာပွန်မြို့ အခြေစိုက် ခလရ(၁၉)စခန်းကို တစ်ကြိမ်၊ ဒွယ်လိုးမြို့နယ် တာဂေါ်ခီးရွာအနီးတွင် တစ်ကြိမ်တိုက်ပွဲဖြစ်ခဲ့ရာ စစ်ကောင်စီတပ်မှ သုံးဦး သေဆုံးခဲ့ကြောင်း ထုတ်ပြန်သည်။ယင်းတိုက်ပွဲ၌ တပ်မဟာ(၅)ဘက်က ထိခိုက်ကျဆုံးမရှိဟု ဆိုသည်။
စက်တင်ဘာ ၂၃ရက်ကလည်း စစ်ကောင်စီတပ်ဖွဲ့ဝင်များနှင့် တပ်မဟာ(၅) တပ်ဖွဲ့ဝင်များအကြား တိုက်ပွဲများဖြစ်ပွားခဲ့သည်ဟု ဆိုသည်။ ဒွယ်လိုးမြို့နယ် မော့ကူးလူဒေသ၌ တစ်ကြိမ်၊ မူတြော်ကလိုးဒေသ၌ တစ်ကြိမ်၊ ဖာပွန် – ကမမောင်း ကားလမ်းရှိ ဆင်ဆွယ်နှင့် တောင်သုံးလုံးကြား၌ နှစ်ကြိမ် တိုက်ပွဲဖြစ်ပွားခဲ့ကြောင်း အသိပေးထားပြီး စစ်ကောင်စီတပ်က တစ်ဦးဒဏ်ရာရရှိခဲ့သည်ဟု ထုတ်ပြန်သည်။
KNUတပ်မဟာ(၅)နယ်မြေတွင် တိုက်ပွဲများ နေ့စဉ်ဖြစ်ပွားလျက်ရှိပြီး စစ်ကောင်စီတပ်က သေဆုံးထိခိုက်များပြားလျက်ရှိသည်။
