ဒီးမော့ဆိုမြို့နယ်၊ ခေါက်ပလော့ကျေးရွာ တိုက်ပွဲ နှစ်ဖက်ထိခိုက်ကျဆုံးမှုရှိကြောင်း PDF လွိုင် ကော်က ယနေ့(စက်တင်ဘာ ၂၅ ရက်) ထုတ်ပြန် သည်။
တိုက်ပွဲမှာ ယမန်နေ့ (စက်တင်ဘာ ၂၄ ရက်)ကခေါက်ပလော့ ကျေးရွာ၊ ပြည်သူ့ နေအိမ်များ၌ တပ်စွဲထားသော စစ်ကောင်စီအား ကရင်နီမဟာမိတ်ပြည်သူ့တပ်များမှ ပူးပေါင်းတိုက်ခိုက်မှု ပြုလုပ်ခဲ့သည်ဟု ဆိုသည်။
စစ်ကောင်စီမှ လက်နက်ကြီးအင်အား မတန်တဆသုံးခဲ့သော်လည်း မဟာမိတ်များမှ ကြံ့ကြံ့ခံခုခံတိုက်ပွဲဝင်ခဲ့ပြီး အကြမ်းဖက်စစ်ကောင်စီတပ်သားများ ထိခိုက်မှုရှိခဲ့ပြီးတိကျသော အရေအတွက်ကိုမူ မသိနိုင်သေးပေ။
ကရင်နီတပ်မတော်(KA)အပြင် PDF များနှင့် KNDF တို့မှ ပူးပေါင်းဆင်နွှဲခြင်းဖြစ်ပြီး လွိုင် ကော် PDF မှ နှစ်ဦး ဒဏ်ရာရရှိခဲ့ပြီး စနစ်တကျ ဆေးကုသမှုကို ခံယူလျက်ရှိကြောင်း အသိပေးသည်။
“ကျတာ KNDF တပ်ရင်း (၁)ဘက်က ရဲဘော်နှစ် ဦးလို့သိရတယ်။မနေ့က မနက်ကတည်းက တိုက် ပွဲဖြစ်နေတာ။ဒီနေ့လည်း တိုက်ပွဲဆက်ပြင်းထန်နေတယ်။စကစ ဘက်က ဂျက်လေယာဥ်တစ်စီး ပါ တွေ့ရတယ်”ဟု ကရင်နီစစ်ရေးသတင်းရင်း မြစ်က ပြောသည်။
တိုင်းပြည်အတွက် အသက်ပေးလှူသွားကြသော တပ်ရင်းအသီးသီးမှ သူရဲကောင်းရဲဘော်များအားလွိုင်ကော် PDF မှ အလေးပြုဦးညွှတ်ပြီးအရေးတော်ပုံပြီးဆုံးသည်ထိ တိုက်စစ်နေရာမှ ပါဝင်မည်ဟု ကတိပြုဖော်ပြသည်။
ယခုလအတွင်း ကရင်နီဒေသရှိ မြို့နယ်အများစု (ဒီးမော့ဆို၊လွိုင်ကော်၊မိုးဗြဲ၊ဖယ်ခုံနှင့် ဖရူဆို)တို့တွင် နေ့စဥ်တိုက်ပွဲများဖြစ်ပွားနေပြီး စစ်ကောင်စီတပ်မှ အများအပြားသေဆုံးကာ ကရင်နီတပ်ပေါင်းစုမှ ရဲဘော် ၁၄ဦး ကျဆုံးခဲ့ရသည်။
