ရွှေဘို – မန္တလေးလမ်းပိုင်းရှိ ရွာသာကြီးရွာကို စစ်ကောင်စီတပ်က လက်နက်ကြီးဖြင့်ပစ်၍ ပြည်သူ ၃၀ခန့် ထိခိုက်ဒဏ်ရာရ၊ စစ်တပ်က ရွာကိုပါ မီးတင်ရှို့နေ

အုန်းတော-ရွှေဘိုလမ်းနှင့် ဝက်လက်-လှတောလမ်းများ သွားလာခြင်းမပြုရန် သတိပေးထား

စစ်ကိုင်းတိုင်း၊ ဝက်လက်မြို့နယ် ရွှေဘို – မန္တလေးလမ်းမကြီးပေါ်ရှိ ရွာသာကြီးစံပြကျေးရွာကို စစ်ကောင်စီတပ်က လက်နက်ကြီးဖြင့်ပစ်ခတ်၍ ဒေသခံပြည်သူ ၃၀ဦးခန့် ထိခိုက်ဒဏ်ရာရရှိထားပြီး ကျေးရွာကိုပါ မီးရှို့ဖျက်ဆီးနေကြောင်း ဒေသတွင်း သတင်းရင်းမြစ်များက ပြောသည်။

ယနေ့ (စက်တင်ဘာလ ၂၅ရက်) နံနက်၆နာရီခန့်က စစ်ကောင်စီတပ် ယာဉ်တစ်စီးသည် ရွာသာကြီးစံပြကျေးရွာသို့ ရောက်ရှိလာကာ လက်နက် ကြီးများဖြင့် ရမ်းသမ်းပစ်ခတ်ဝင်ရောက်လာပြီး ဒေသခံပြည်သူ ၃၀ဦးခန့် လက်နက်ကြီးထိမှန် ဒဏ်ရာရခဲ့ကြောင်း ဝက်လက်မြို့နယ် သတင်းမှန်ပြန်ကြားရေးနှင့် ဒေသတွင်းသတင်းရင်းမြစ်များက ပြောသည်။

နံနက် ၉ နာရီ ၁၀မိနစ်ခန့်တွင် စစ်ကောင်စီတပ်က ရွာသာကြီးရွာရှိ အိမ်အချို့ကို စတင်မီးရှို့ဖျက်ဆီးနေကြောင်း၊ ပြည်သူများထွက်ပြေးတိမ်းရှောင်နေရပြီး အများစုမှာ ကျေးရွာအတွင်း ပိတ်မိနေကြောင်း ဒေသခံများက ပြောသည်။

ယနေ့နံနက်ပိုင်းက ရွှေဘိုမြို့ဘက်မှထွက်လာသော စစ်ကောင်စီကားနှစ်စီးသည် ရွာသာကြီးစံပြကျေးရွာအနီးတွင် မိုင်းခွဲတိုက်ခိုက်ခံခဲ့ရပြီးနောက် ရွာသာကြီးအား ဝင်ရောက်ပစ်ခတ်စီးနင်းခဲ့ခြင်းဖြစ်ကြောင်း ဒေသခံများက ပြောသည်။

“ရွာမြောက်ပိုင်းကစရှို့နေတယ်။ လက်နက်ကြီးနဲ့ပစ်လို့ အနီးနားရွာတွေက နွားတွေလည်းသေတယ်။ စစ်ကိုင်းဘက်ကလည်း စစ်ကား ၅စီးလောက်တက် လာတယ်။ ပြည်သူများလည်း ဒဏ်ရာရရှိထားပါတယ်။”ဟု ဒေသခံတစ်ဦးက ပြောသည်။

စစ်ကောင်စီတပ်သောင်းကျန်းနေ၍ ရွှေဘို-ဝက်လက်-အုန်းတောလမ်း၊ ဝက်လက်-လှတော လမ်းပိုင်းများအား ယနေ့လုံးဝ ဖြတ်သန်းသွားလာခြင်း မပြုကြပါရန် ဒေသတွင်းအဖွဲ့များက အသိပေးထားသည်။

စက်တင်ဘာ၂၂ ရက် ညနေပိုင်းကလည်း ရွှေဘို-မန္တလေးလမ်းမကြီးပေါ်၊ စိုင်နိုင်ကွေ့အနီး၌ စစ်ကောင်စီယာဥ်တိုက်ခိုက်ခံရပြီး ထိခိုက်သေဆုံးမှုများ ရှိခဲ့သည်။