▪︎လက်နက် ၃ လက်နှင့်ကျည်များအပါအဝင် စစ်အသုံးအဆောင်များသိမ်းဆည်းရရှိ
စစ်ကိုင်းတိုင်း၊ ချောင်းဦးမြို့နယ်၊ မုံရွာ-မန္တလေးလမ်းတွင် မိုင်းထိသည့်ထောက်ပို့ကားပြင်နေစဥ် ဝင်ရောက်ပစ်ခတ်တိုက်ခိုက်ရာ စစ်ကောင်စီတပ်ဖွဲ့ဝင် ၈ ဦးသေဆုံးပြီး လက်နက်နှင့်ကျည်အပါအဝင် စစ်အသုံးအဆောင်များ သိမ်းဆည်းနိုင်ခဲ့ကြောင်း ချောင်းဦးမြို့နယ်ပြည်သူ့ကာကွယ်ရေးတပ်ဖွဲ့ (CHUPDF)က သတင်းထုတ်ပြန်သည်။
ယမန်နေ့ (စက်တင်ဘာလ ၂၅ ရက်နေ့)က စစ်ကိုင်းမြို့မှ မုံရွာမြို့သို့ထွက်ခွာလာသည့် စစ်ကောင်စီထောက်ပို့ယာဉ်တန်းကို ချောင်းဦးမြို့နယ်ပြည်သူ့ကာကွယ်ရေးတပ်ဖွဲ့ (CHUPDF) တပ်ခွဲ ၄ (မိုင်းတပ်ခွဲ) မှ ရဲဘော်များက ချောင်းဦးမြို့နှင့် ခင်မွန်ကျေးရွာကြားတွင် မိုင်းဆွဲတိုက်ခိုက်ရာ စစ်ကောင်စီကား(၁)စီးပျက်စီးရပ်တန့်သွားခဲ့ပြီး အကြမ်းဖက်စစ်ကောင်စီကားနောက်တစ်စီးကရပ်တန့်ကူညီခဲ့ကြောင်းချောင်းဦး PDFက ပြောသည်။
စစ်ကောင်စီ ကား (၂) စီးရပ်တန့်ပြုပြင်နေကြောင်း CHUPDF တပ်ခွဲ ၄ (မိုင်းတပ်ခွဲ) ရဲဘော်များ၏ သတင်းပေးပို့ချက်အရ ပြည်သူ့ကာကွယ်ရေးအဖွဲ့ (ပကဖ) – ချောင်းဦးမြို့နယ် တာဝန်ခံထံ ဆက်လက်သတင်းပို့ကာ ချောင်းဦးမြို့နယ် ပကဖ အင်အားစုဖွဲ့ရေးနှင့်လေ့ကျင့်ရေးတာဝန်ခံဦးစီး အင်အား ၄ ဦး နှင့် CHUPDF တပ်ခွဲ (၁)၊ တပ်ခွဲ (၄) ပူးပေါင်းအဖွဲ့က အဆိုပါကား (၂) စီးကို ဝင်ရောက်တိုက်ခိုက်ရှင်းလင်းခဲ့သည်။
ကားပေါ်တွင်ပါရှိသော စစ်ကောင်စီ လက်နက်ကိုင် ၅ ဦးနှင့် ခင်မွန်အခြေစိုက် နမခ ဘက်စုံခြံမှလာရောက်ကူညီသည့် စစ်ကောင်စီ လက်နက်ကိုင် ၁ ဦး ပေါင်း (၆) ဦး သေဆုံးခဲ့ပြီး ခင်မွန်အခြေစိုက် နမခ ဘက်စုံခြံမှလာရောက်ကူညီသည့် စစ်ကောင်စီ တပ်သား ၂ ဦး ဒဏ်ရာဖြင့်အရှင်ဖမ်းဆီးရမိခဲ့ကြောင်း ချောင်းဦး PDFက အသိပေးသည်။
ဒဏ်ရာဖြင့် အရှင်ဖမ်းဆီးရမိသူ ၂ ဦးအနက် ၁ ဦးမှာ ဖမ်းဆီးခေါ်ဆောင်လာရာလမ်းတွင် သေဆုံး ၁ ဦးမှာ စခန်းတွင်ဆေးဝါးကုသပေးစဉ်သေဆုံးသွားခဲ့ကြောင်း ချောင်းဦး PDFက ပြောသည်။
၎င်းတို့ထံမှ BA-72(G1) ၁လက်၊ MA-3 ၁လက်၊ BA-94(Uzhi) ၁လက်၊ 7.62(ကပစ) ၂၀တောင့်၊ 5.56(ကပစ) ၂၆တောင့်၊ 9mm(ကပစ) ၁၅တောင့်၊ ဓားမြှောင် ၁လက်၊ Mytel Keypad ၁လုံး၊ walkitalki (ဆက်သွယ်ရေးစကားပြောစက်) ၁လုံး သိမ်းဆည်းရရှိခဲ့ကြောင်း ချောင်းဦး PDFက အသိပေးသည်။
ထိုဖြစ်စဥ်တွင် CHUPDF တပ်ခွဲ (၁) မှ ရဲဘော် ၁ ဦး၊ တပ်ခွဲ (၄) မှ ရဲဘော် ၁ ဦး ပေါင်း ၂ ဦး မစိုးရိမ်ရဒဏ်ရာရရှိခဲ့ကြောင်း သိရသည်။
