စစ်ကိုင်းတိုင်း၊ ဝက်လက်မြို့နယ်အရှေ့ခြမ်း ဧရာဝတီမြစ်အတွင်း၌ ရဲနှင့်စစ်သားများလိုက်ပါလာသော စက်လှေသုံးစီးအား ရေမြုပ်မိုင်းဖြင့် မိုင်းခွဲတိုက်ခိုက်ရာ တစ်ပွင့်ဗိုလ်တစ်ဦးအပါအဝင် ငါးဦးသေဆုံးကြောင်း တောကြီးမြွေပွေးအဖွဲ့က ပြောသည်။
ယနေ့ (စက်တင်ဘာ ၂၆ ရက်) နံနက်၆နာရီခန့်က ဝက်လက်မြို့နယ်၊ ရှိမ်းမကားရဲစခန်းမှ ဧရာဝတီမြစ်အတွင်း သွားလာနေသော ပြည်သူများအား ခြိမ်းခြောက်ငွေညှစ်ပြီး ပြန်လာသည့် စစ်ကောင်စီတပ်နှင့်ရဲများအား တောကြီးမြွေပွေးတပ်ဖွဲ့နှင့် ရွှေဘိုခရိုင်တပ်ရင်း(၁၇) (ဒေါင်းစစ်သည်) တို့ပူးပေါင်း၍ တိုက်ခိုက်ခဲ့ခြင်းဖြစ်ကြောင်း တောကြီးမြွေပွေးအဖွဲ့က ပြောသည်။
ထိုသို့တိုက်ခိုက်ရာတွင် အေးဝင်းထွန်း (တစ်ပွင့်ဗိုလ်)၊ ကျော်ဝင်းထွန်း၊ စည်သူမောင်အပါအဝင် ရဲနှင့် စစ်သား စုစုပေါင်း ငါးဦးသေဆုံးပြီး ခြေပြတ်လက်ပြတ်နှင့် အပြင်းထန်ဒဏ်ရာရသူများရှိကြောင်း တောကြီးမြွေပွေးအဖွဲ့က အသိပေးသည်။
ဖြစ်စဥ်နှင့်ပတ်သက်၍ တောကြီးမြွေပွေးအဖွဲ့ခေါင်းဆောင်ဗိုလ်တီက “စက်လှေတွေနဲ့ရေကြောင်းထဲသွားလာနေတဲ့ ပြည်သူတွေကိုငွေကြေးအတင်းတောင်းလို့ပါ။ တစ်စီးမြုပ်သွားတယ်ဗျ။ တစ်စီးရေထဲမျောလာတယ်။ လှေပေါ်မှာ အရိုးတွေ အသားစတွေနဲ့ဗျ။ ကျည်တွေလည်းပါတယ်။လက်နက်တွေတော့မရလိုက်ဘူးပျက်စီးကုန်တယ်ထင်တယ်ဗျ။”ဟု ပြောသည်။
စစ်ကောင်စီဘက်က သေဆုံးထိခိုက်မှုအခြေအနေကို ထပ်မံအတည်ပြုနိုင်ခြင်း မရှိသေးပေ။
ဝက်လက်မြို့နယ်အရှေ့ခြမ်း၊ ဧရာဝတီမြစ်ကမ်းဘေး၌ စစ်ကောင်စီတပ်နှင့်ဒေသကာကွယ်ရေးအဖွဲ့များ တိုက်ပွဲများ မကြာခဏ ဖြစ်ပွားနေသည်။
