ဂျပန်နိုင်ငံ ဝန်းကြီးချုပ်ဟောင်း ရှင်ဇိုအာဘေး၏ နိုင်ငံတော်စျာပနအခမ်းအနားကို စစ်ကောင်စီအား ဖိတ်ကြားခဲ့မှုအပေါ် ဂျပန်ရောက်မြန်မာနိုင်ငံသားများက ဆန့်ကျင်ကြောင်း ယနေ့ (စက်တင်ဘာ ၂၇) ညနေပိုင်း၌ ကန့်ကွက်ဆန္ဒပြခဲ့ကြသည်။
ဂျပန်ရောက်မြန်မာနိုင်ငံသားများက ယနေ့ ညနေပိုင်းတွင် ကိုဘေးမြို့ Sannomiya ဘူတာတွင် စုဝေး၍ မြန်မာစစ်အစိုးရ၏ ကိုယ်စားလှယ်အား ဂျပန်နိုင်ငံက ဖိတ်ကြားမှုကို ဆန့်ကျင်ကြောင်း ဂျပန်၊ အင်္ဂလိပ် နှစ်ဘာသာဖြင့် ရေးသားသည့် စာတန်းကို ကိုင်ဆောင်၍ ဆန္ဒထုတ်ဖော်ခဲ့သည်။
ဝန်ကြီးချုပ်ဟောင်း ရှင်ဇိုအာဘေးသည် အထက်လွှတ်တော်ရွေးကောက်ပွဲ ဝင်ပြိုင်မည့် ၎င်း၏ပါတီမှ ကိုယ်စားလှယ်အတွက် ကူညီ၍ မဲဆွယ်စည်းရုံးပေးနေစဉ် ပြီးခဲ့သည့် ဇူလိုင် ၈ရက်တွင် ဂျပန်နိုင်ငံ၊ နာရမြို့၌ သေနတ်သမားတစ်ဦး၏ လက်ချက်ဖြင့် လုပ်ကြံခံခဲ့ရပြီး သေဆုံးခဲ့သည်။
ထိုသို့ အကြမ်းဖက်လုပ်ကြံခံရပြီး ကျဆုံးခဲ့သည့် ဝန်ကြီးချုပ်ဟောင်း ရှင်ဇိုအာဘေး၏ ဈာပနတွင် မြန်မာပြည်အတွင်း အကြမ်းဖက်မှုများ ဆက်တိုက်ကျူးလွန်နေသည့် အာဏာသိမ်းစစ်ကောင်စီ ၏ ကိုယ်စားလှယ် တက်ရောက်မည့်အပေါ် ဂျပန်ရောက် မြန်မာအသိုင်းအဝိုင်းက ဆန့်ကျင်ကန့်ကွက်နေခြင်း ဖြစ်သည်။
