စစ်ကောင်စီတပ်မှ ဗိုလ်ကြီးအပါအဝင် နှစ်ဦးသေဟုဆို
ရန်ကုန်တိုင်း သန်လျင်မြို့နယ်ရှိ နည်းပညာတက္ကသိုလ်ဝင်းအတွင်းတပ်စွဲထားသည့် စစ်အုပ်စုကို ဗုံးခွဲတိုက်ခိုက်ခဲ့ကြောင်း ရန်ကုန်မြို့ပြပြောက်ကျားတပ်ဖွဲ့(YPDF)က ထုတ်ပြန်သည်။
အဆိုပါတိုက်ခိုက်မှုကို ယမန်နေ့(စက်တင်ဘာ ၂၆ ရက်) ည ၉ နာရီခွဲခန့်က လုပ်ဆောင်ခဲ့ခြင်းဖြစ်ပြီး ဖောက်ခွဲတိုက်ခိုက်မှုကြောင့် စစ်ကောင်စီတပ်မှ နှစ်ဦးသေဆုံးခဲ့ရာ သုံးပွင့်ဖြင့်အရာရှိတစ်ဦးပါဝင်ကြောင်းလည်း ဖော်ပြသည်။
“မျက်မြင်တွင် နှစ်ဦးသေဆုံးပြီး၊ လေးဦးခန့် သေဆုံးနိုင်ပါသည်။ ဒဏ်ရာအများအပြားရနိုင်၊ စခ အမျာအပြားဆုံးရှုံးမှုရှိပါ၍ ယနေ့တွင် ထိုနေရာအနီးတစ်ဝိုက်၌ စခများရမ်းကားနိုင်ခြေရှိပါသောကြောင့် ပြည်သူများသတိထားရှောင်ရှားနိုင်ကြပါရန် အသိပေးထုတ်ပြန်လိုက်သည်”ဟု YPDF ထုတ်ပြန်ချက်တွင် ဖော်ပြသည်။
အထက်ပါတိုက်ခိုက်မှုကို သန်လျင်မြေအောက်ပြောက်ကျားတပ်ဖွဲ့နှင့် ရန်ကုန်မြို့ပြပြောက်ကျား တပ်ဖွဲ့တို့ ပူးပေါင်းလုပ်ဆောင်ခဲ့ခြင်းဖြစ်ကြောင်း အသိပေးထားသည်။
