တိုက်ပွဲဆက်ဖြစ်နိုင်၍ ပြည်သူများ သတိထားရန် CDF တာဝန်ရှိသူ အသိပေး
ချင်းပြည်နယ် မတူပီမြို့နယ်တွင် ယနေ့ တိုက်ပွဲဖြစ်ပွားပြီး နှစ်ဖက်ထိခိုက်ကျဆုံးရှိခဲ့သည်ဟု မတူပီ ချင်းကာကွယ်ရေးတပ်(CDF)က အသိပေးသည်။
“ထိခိုက်ကျဆုံးက စကစ ဘက်က ၄ယောက်သေတယ်။ ၆ယောက်ဒဏ်ရာရရှိသွားတယ် ။ ကျွန်တော်တို့ မတူပီ CDFက ရဲဘော်တစ်ဦး ကျဆုံးသွားတာပေါ့”ဟု မတူပီ CDF တာဝန်ရှိသူက ပြောသည်။ တိုက်ပွဲ ဆက်ဖြစ်နိုင်၍ ပြည်သူများ အနေဖြင့် သတိထားသွားလာဖို့ ၎င်းက တိုက်တွန်းထားသည်။
စက်တင်ဘာ ၂၄ရက်က စစ်ကြောင်းထိုးဝင်ရောက်လာသည့် စစ်ကောင်စီတပ် နှင့် မတူပီ – ဟာခါးလမ်း ငလိုင်ရွာအနီးတွင် ယနေ့(စက်တင်ဘာ ၂၇ရက်) နံနက် ၇နာရီမှစ၍ တိုက်ပွဲဖြစ်ခဲ့သည်ဟု ဆိုသည်။
တိုက်ပွဲမှာ ၃နာရီခွဲနီးပါး ကြာမြင့်ခဲ့ပြီး စစ်ကောင်စီတပ်မှ လေးဦးသေဆုံးကာ ခြောက်ဦး ဒဏ်ရာရရှိခဲ့ပြီး မတူပီ CDFမှ ရဲဘော် တစ်ဦးကျဆုံးခဲ့ကြောင်း အသိပေးထုတ်ပြန်ထားသည်။
စစ်ကောင်စီတပ်က ဟားခါး – မတူပီလမ်းသို့ အင်အား ၂၀၀ခန့်ဖြင့် စစ်ကြောင်းထိုးလာခြင်းကြောင့် စက်တင်ဘာ ၂၄ရက်တွင် တစ်ကြိမ်၊ ၂၅ရက်တွင် တစ်ကြိမ် တိုက်ပွဲဖြစ်ခဲ့ပြီး ယင်းတိုက်ပွဲများ၌ စစ်ကောင်စီတပ်က ခုနစ်ဦးထက်မနည်းသေဆုံးကာ ဒဏ်ရာရသူများစွာရှိခဲ့သည်ဟုဆိုသည်။ CDF ရဲဘော်တစ်ဦးလည်း ဒဏ်ရာရခဲ့သည်။
ထို့ကြောင့် မတူပီ CDFနှင့် စစ်ကောင်စီတပ် တိုက်ပွဲ သုံးကြိမ်အတွင်း CDFက ရဲဘော် တစ်ဦးကျဆုံး တစ်ဦး ဒဏ်ရာရခဲ့ပြီး စစ်ကောင်စီတပ်က ၁၁ဦး သေဆုံးကာ ဒဏ်ရာရသူ ၁၄ဦးထက်မနည်းရှိခဲ့သည်။
