ဒေသခံပြည်သူ လေးထောင်ကျော် ဘေးလွတ်ရာသို့ ထွက်ပြေးတိမ်းရှောင်နေရ
ကရင်အမျိုးသားအစည်းအရုံး(KNU) တပ်မဟာ (၃) နယ်မြေ ညောင်လေးပင်ခရိုင် ကျောက်ကြီးမြို့နယ်တွင် စစ်ကောင်စီတပ်က လက်နက်ကြီးဖြင့် ပစ်ခတ်၍ ဒေသခံပြည်သူနှစ်ဦးသေဆုံးပြီး ငါးဦး ဒဏ်ရာရခဲ့ကြောင်း KNUက သတင်းထုတ်ပြန်သည်။
စက်တင်ဘာ ၂၉ရက် ညနေပိုင်းက ကျောက်ကြီးမြို့နယ်ရှိ ဘောကထာစစ်ကောင်စီတပ်စခန်းက ဘောကထာရွာအတွင်း RPG ဖြင့် ပစ်ခတ်၍ ပြည်သူလူထု ထိခိုက်ဒဏ်ရာရခဲ့ခြင်းဖြစ်သည်ဟုဆိုသည်။
သေဆုံးခဲ့ရသူ နှစ်ဦးအမှာ အသက် ၆၀ကျော်အရွယ် အမျိုးသားတစ်ဦးနှင့် အသက် ၅၆နှစ်အရွယ် အမျိုးသမီးတစ်ဦးတို့ ဖြစ်သည်ဟုဖော်ပြထားသည်။
စစ်ကောင်စီတပ်၏ ထိုသို့ပစ်ခတ်မှုကြောင့် ဘောကထာကျေးရွာ၊ ပဒဲကောကျေးရွာနှင့် မဘီကျေးရွာမှ အိမ်ခြေ ၈ရာကျော်မှ လူဦးရေ လေးထောင်ကျော်တို့ ဘေးလွတ်ရာသို့ ထွက်ပြေးတိမ်းရှောင်ခဲ့ရသည်ဟု အသိပေးထားသည်။
ကျောက်ကြီးမြို့နယ်တွင် စစ်ကောင်စီတပ်နှင့် KNLA တပ်မဟာ(၃)တို့ စက်တင်ဘာ ၇ရက်မှစ၍ တိုက်ပွဲများ ဖြစ်ပွားနေခြင်းဖြစ်သည်။
တပ်မဟာ(၅)ဘက်မှ ပြန်ဆင်းလာသည့် စစ်ကောင်စီတပ်နှင့် တိုက်ပွဲဖြစ်ပွားလျက်ရှိရာ စက်တင် ဘာ၂၉ရက်အထိ ရက်ရှည် တိုက်ပွဲဖြစ်ပွားနေကြောင်း ၊ တိုက်ပွဲအတွင်း နှစ်ဖက်ထိခိုက်ကျဆုံး အခြေအနေကို အတည်မပြုနိုင်သေးကြောင်း ဖော်ပြထားသည်။
စစ်ကောင်စီတပ်သည် အဆိုပါဒေသတွင်းရှိ ပြည်သူလူထုများ၏ နေအိမ်များကို ဝင်ရောက် မွှေနှောက် ဖျက်ဆီးခြင်း၊ အိမ်မွေးတိရိစ္ဆာန်များကို ဖမ်းယူစားသောက်ခြင်းများ ပြုလုပ်ခဲ့သည်ဟုဆိုသည်။