ကရင့်အမျိုးသား အစည်းအရုံး၊ တပ်မဟာ(၆) နယ်မြေ မြ၀တီ – ဝေါ်လေလမ်း၌ ယမန်နေ့က တိုက်ပွဲ နှစ်နေရာ ဖြစ်ပွားခဲ့ရာ စစ်ကောင်စီတပ်က သုံးဦးသေဆုံးခဲ့ကြောင်း ကော်ဘရာ စစ်ကြောင်းက သတင်းထုတ်ပြန်သည်။
အဆိုပါလမ်းရှိ လူခို့ ဒေသသို့ ကျူးကျော်လာသောအကြမ်းဖက် စစ်ကောင်စီ၏ တပ်ရင်း တပ်ဖွဲ့များကို ကရင်အမျိုးသားလွတ်မြောက်ရေးတပ်မတော် (KNLA)တပ်ရင်း (၂၇) ကော်ဘရာ ပူးပေါင်းစစ်ကြောင်းနှင့် တပ်မဟာစစ်ကြောင်း တပ်ခွဲ (၂)တို့ တိုက်ခိုက်ခဲ့၍ တိုက်ပွဲဖြစ်ပွားခဲ့သည်ဟု ဆိုသည်။
အောက်တိုဘာ ၅ရက် နေ့လည်ပိုင်းတွင် စစ်ကောင်စီတပ်က လက်နက်ကြီးများဖြင့် ပစ်ခတ်သကဲ့သို့ ပူးပေါင်းတပ်ဖွဲ့များကလည်း လက်နက်ကြီးဖြင့် ပစ်ခတ်ခြင်း၊ ဒရုန်းဖြင့် ဗုံးကြဲခြင်း ပြုလုပ်ခဲ့ရာအကြမ်းဖက်စစ်ကောင်စီဘက်မှ သုံးဦး ထိခိုက်ဒဏ်ရာ ရရှိခဲ့ကြောင်း ဖော်ပြထားသည်။
အလားတူ တောင်နီးကျေးရွာအနီးရှိ အကြမ်းဖက် စစ်ကောင်စီ၏ ခမရ (၁၀၄)အား ပူးပေါင်းတပ်ဖွဲ့က ယမန်နေ့ နေ့လည်ပိုင်း၌ စနိုက်ပါဖြင့် တိုက်ခိုက်ခဲ့ရာ စစ်ကောင်စီတပ်မှ သုံးဦးသေဆုံးခဲ့ကြောင်း ထုတ်ပြန်သည်။
ယမန်နေ့ တိုက်ပွဲများအတွင်း ကော်ဘရာ စစ်ကြောင်းနှင့် ပူးပေါင်းတပ်ဖွဲ့များဘက်က ထိခိုက်ကျဆုံးမရှိကြောင်း အသိပေးထားသည်။
အဆိုပါ မြ၀တီ -ဝေါ်လေလမ်းတွင် စစ်ကောင်စီတပ်က အင်အားအလုံးအရင်းဖြင့် စစ်ကြောင်းထိုးပြီး လက်နက်ကြီး၊ လေကြောင်းပစ်ကူများအသုံးပြုတိုက်ခိုက်လျက်ရှိသော်လည်း ကော်ဘရာ စစ်ကြောင်းနှင့် ပူးပေါင်းတပ်ဖွဲ့များကို ချေမှုန်းနိုင်ခြင်းမရှိဘဲ စစ်ကောင်စီတပ်ဘက်က အထိနာလျက်ရှိသည်။
ထိုသို့ စစ်ကောင်စီဘက်က သေဆုံးထိခိုက်မှုများပြားနေခြင်းမှာ စိတ်ဓာတ်ပိုင်းဆိုင်ရာ ကျဆင်းမှု၊ နယ်မြေမကျွမ်းကျင်မှု ၊ တိုက်ခိုက်ရေး အရ ညံဖျင်းမှု တို့ကြောင့် ဖြစ်သည်ဟု KNU သတင်းရင်းမြစ်က ပြောသည်။
“သူတို့ စီမံကွပ်ကဲမှု ညံ့လို့ သူတို့လူတွေက တိုက်ပွဲမှာလည်း ကျသွားတယ်။ နောက်ပြီးတော့ တပ်ပြေးတွေလည်းများလာတယ်။ ပြောရမယ်ဆို သူတို့ဘက်က အထိနာတာပေါ့”ဟု KNU သတင်းရင်းမြစ်က ပြောသည်။
တိုက်ပွဲ၌ အထိနာသည့် စစ်ကောင်စီတပ်သည် အခြားဒေသများနည်းတူ ကရင်ဒေသတိုက်ပွဲများ၌ လူထုကို ပစ်မှတ်ထား တိုက်ခိုက်မှုများလုပ်ဆောင်လျက်ရှိကြောင်း ၎င်းကဆက်ပြောသည်။
စစ်ကောင်စီတပ်က ကော်ဘရာစစ်ကြောင်းထိန်းချုပ်စိုးမိုးထားသော မြဝတီ-ဝေါလေလမ်းပိုင်းကို ရရှိရန် ပြီးခဲ့သည့်ဇူလိုင်လဆန်းမှ စ၍ ရင်ဆိုင် တိုက်ပွဲကြီး တိုက်ပွဲငယ် အကြိမ် (၂၀) ထက်မနည်း တိုက်ခိုက်ခဲ့သည်။သို့သော်လည်း စစ်ကောင်စီတပ်မှ အရာရှိအပါအဝင် စစ်သားများ၊သေဆုံးဒဏ်ရာရခြင်း ၊CDM ပြုလုပ်ခြင်း ၊တပ်ပျက်၍ အရာရှိများအရေးယူခံရသည်အထိ အထိနာခဲ့သည်။
“စစ်ကောင်စီအနေနဲ့ ရှေ့ဆက်တိုးနေသမျှ ကာလပတ်လုံး လုံးပါးပါးပြီး တပ်ပါ ပျောက်နိုင်တယ်။” ဟုကော်ဘရာစစ်ကြောင်းမှ ပြန်ကြားရေးတာဝန်ခံ ကိုမျိုးသူရကိုကိုကအောက်တိုဘာ၄ ရက်တွင် People’s Spring သို့ပြောသည်။
သုံးလဝန်းကျင်ကြာတိုက်ပွဲများတွင်စစ်ကောင်စီတပ်က လေကြောင်းတိုက်ခိုက်မှု ၊လေကြောင်းကြည်းကြောင်းပူးပေါင်းတိုက်ခိုက်မှု စသဖြင့်ဗျူဟာမျိုးစုံသုံးခဲ့သော်လည်းစစ်တပ်ပင်အထိနာနေခြင်းဖြစ်သည်။
