ရှမ်းပြည်နယ်မြောက်ပိုင်း မူဆယ်မြို့လယ်တွင် မြို့နယ်တရားသူကြီးတစ်ဦး ပစ်သတ်ခံရမှု ယနေ့(အောက်တိုဘာ၆ရက်) ညနေက ဖြစ်ပွားခဲ့သည်။
မူဆယ်မြို့ ပြည်ထောင်စုလမ်းမကြီးပေါ်တွင် ကားမောင်းနှင်လာသည့် တရားသူကြီးတစ်ဦးကို အမျိုးသားအချို့က သေနတ်ဖြင့် အနီးကပ်ပစ်သတ်သွားခြင်းဟု ဒေသခံများက ပြောသည်။
“ပစ္စတိုနဲ့ပစ်သွားတာ ပွဲချင်းပြီးပဲတဲ့။ ညနေ ၅နာရီခွဲလောက်က ပစ်သွားတာ”ဟု ဒေသခံတစ်ဦးက ပြောသည်။
သေဆုံးသူသည် မူဆယ်မြို့နယ်တရားသူကြီးဟု ဒေသခံအချို့က ပြောသော်လည်း အမည်နှင့်ရာထူးအသေးစိတ်ကို သီးခြားအတည်မပြုနိုင်သေးပေ။ တရားသူကြီးအချို့ကမူ ၎င်းတို့၏ လုပ်ဖော်ကိုင်ဘက်မိတ်ဆွေ တရားသူကြီး အသတ်ခံရသည်ဟုဆိုကာ ဝမ်းနည်းကြောင်း လူမှုကွန်ရက်၌ ရေးတင်ထားသည်ကို တွေ့ရသည်။
