စစ်ကိုင်းတိုင်း၊ ပုလဲမြို့ပေါ်၌ ယမန်နေ့ညက ညအချိန်ကင်းလှည့်လာသည့် စစ်ကောင်စီတပ်ကို မိုင်းဆွဲတိုက်ခိုက်ရာ နှစ်ဦးသေဆုံးနိုင်ကြောင်း ဒေါင်းနက်-နယ်စည်းမခြားပြောက်ကျားတပ်ဖွဲ့က သတင်းထုတ်ပြန်သည်။
ပုလဲမြို့ပေါ် တပ်စွဲထားသော စစ်ကောင်စီတပ်သားများသည် ယမန်နေ့ (အောက်တိုဘာ ၆ရက်) ည ၉ နာရီခန့်က မြို့ပေါ်ကင်းလှည့်ထွက်လာရာ ပုလဲမြို့နယ်မီးသတ်ရုံးရှေ့၌ မိုင်းဆွဲတိုက်ခိုက်ခဲ့ရာ နှစ်ဦးခန့်သေဆုံးနိုင်ပြီး သုံးဦးခန့်ဒဏ်ရာရရှိသွားကြောင်း ဒေါင်းနက်-နယ်စည်းမခြားပြောက်ကျားတပ်ဖွဲ့ (ယင်းမာပင်ခရိုင်-အမှတ်၁၀တပ်ရင်း)က ယာယီသတင်းနှင့်ပြန်ကြားရေးတာဝန်ခံ ရဲဘော် Escape က အသိပေးသည်။
ဖြစ်စဥ်နှင့်ပတ်သက်၍ ဒေါင်းနက်-နယ်စည်းမခြားပြောက်ကျားတပ်ဖွဲ့ ထံ ဆက်သွယ်မေးမြန်းထားပြီး ပြန်လည်ဖြေကြားခြင်းမရှိသေးပေ။
စစ်ကောင်စီတပ်၏ ထိခိုက်သေဆုံးမှုများနှင့်ပတ်သက်၍ ထပ်မံအတည်ပြုနိုင်ခြင်းမရှိသေးပေ။
ပြီးခဲ့သည့် စက်တင်ဘာ ၁၇ ရက် ညနေပိုင်းကလည်း ပုလဲမြို့ပေါ်ရှိ မြို့နယ်ရဲတပ်ဖွဲ့စခန်း၊ အထွေထွေအုပ်ချုပ်ရေးမှူးရုံးနှင့် စစ်ကောင်စီတပ်စွဲရာနေရာများအား မကွေးတိုင်းနှင့်စစ်ကိုင်းတိုင်းရှိ ပြည်သူ့ကာကွယ်ရေးတပ်ဖွဲ့များက သွားရောက်တိုက်ခိုက်ခဲ့ရာ ထိခိုက်သေဆုံးမှုများရှိခဲ့သည်။
