စစ်ကိုင်းတိုင်း၊ ကန့်ဘလူမြို့နယ် ဇော်ချောင်းကျေးရွာကို မီးရှို့ခဲ့သည့် စစ်ကောင်စီတပ်သည် စစ်ကြောင်း ဆက်ထိုးနေ၍ ပြည်သူအများအပြား ထပ်မံတိမ်းရှောင်နေရကြောင်း ဒေသခံများက ပြောသည်။
ယနေ့ (အောက်တိုဘာ ၇ ရက်) နံနက် ၇ နာရီခန့်က သင်တောကျေးရွာမှ စစ်ကောင်စီတပ်များသည် အရှေ့မြောက်ဘက်ရှိ အောက်တဲရွာဘက်သို့ ဦးတည်ထွက်ခွာလာသည်။
စစ်ကောင်စီတပ် စစ်ကြောင်းထိုးလာ၍ တိမ်းရှောင်နေကြသည့် သင်တောနှင့် ဇော်ချောင်းရွာမှ စစ်ဘေးရှောင်ပြည်သူအချို့သည် ဘေးလွတ်ရာသို့ ထပ်မံထွက်ပြေးတိမ်းရှောင်နေရကြောင်း ကျွန်းလှတက်ကြွလှုပ်ရှားသူများအဖွဲ့က ပြောသည်။
![ထွက်ပြေးတိမ်းရှောင်နေရသော ပြည်သူများ ၊ဓာတ်ပုံ-ကျွန်းလှတက်ကြွလှုပ်ရှားသူများအဖွဲ့](https://i0.wp.com/www.ludunwayoo.com/wp-content/uploads/2022/10/311015996_483465507176240_4231070540509449761_n.jpg?resize=720%2C540&ssl=1)
လက်ရှိတွင် စစ်ကောင်စီတပ်ရန်ကြောင့် ထွက်ပြေးတိမ်းရှောင်ပြည်သူ ၇,၅၀၀ ခန့်ရှိပြီး ကန့်ဘလူခရိုင်တစ်ခုလုံး စစ်ရှောင် ၃သောင်းနီးပါးခန့်ရှိကြောင်း ကျွန်းလှတက်ကြွလှုပ်ရှားသူများအဖွဲ့က ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
“အဲ့ရွာနားတွေကတော့ ဆက်တိုက်ပြေးနေတဲ့သဘောပါဗျ။ ထပ်တိုးတော့ အတိအကျမသိရသေးဘူး။”ဟု ကျွန်းလှတက်ကြွလှုပ်ရှားသူများအဖွဲ့က ပြောသည်။
![ထွက်ပြေးတိမ်းရှောင်နေရသော ပြည်သူများ ၊ဓာတ်ပုံ-ကျွန်းလှတက်ကြွလှုပ်ရှားသူများအဖွဲ့](https://i0.wp.com/www.ludunwayoo.com/wp-content/uploads/2022/10/311117596_483465550509569_6115609567829362444_n.jpg?resize=720%2C540&ssl=1)
အဆိုပါစစ်ကြောင်းထိုးလာသည့် စစ်ကောင်စီတပ်သည် အောက်တိုဘာ ၆ ရက် နံနက် ၁၁ နာရီ ၄၀ ခန့်က ကန့်ဘလူမြို့နယ် မြောက်ခြမ်းရှိ ဇော်ချောင်းရွာအား လေးကြိမ်မြောက် မီးရှို့ဖျက်ဆီးခဲ့ပြိီးနောက် မွန်းလွဲပိုင်းတွင် သင်တောရွာသို့ လက်နက်ကြီးများပစ်ပြီး ထပ်မံဝင်ရောက်ခဲ့သည်။
![ထွက်ပြေးတိမ်းရှောင်နေရသော ပြည်သူများ ၊ဓာတ်ပုံ-ကျွန်းလှတက်ကြွလှုပ်ရှားသူများအဖွဲ့](https://i0.wp.com/www.ludunwayoo.com/wp-content/uploads/2022/10/310065146_483465563842901_6914461923842658914_n.jpg?resize=720%2C540&ssl=1)
စစ်ကောင်စီတပ်သည် ဇော်ချောင်းရွာကို ယခုနှစ်နှစ်လယ်ပိုင်းက နေအိမ်တစ်လုံးကို စတင်မီးရှို့ဖျက်ဆီးခဲ့ကြောင်း၊ ထို့နောက် ဇွန်လ ၈ ရက်တွင် အိမ်ခြေ(၉၃)လုံး၊ အောက်တိုဘာ ၄ ရက်က အိမ်ခြေ သုံးလုံး၊ စုစုပေါင်း အိမ်ခြေ ၉၇လုံး ပျက်စီးဆုံးရှုံးခဲ့ကြောင်း ကျွန်းလှတက်ကြွလှုပ် ရှားသူများအဖွဲ့က ပြောသည်။
ဇော်ချောင်းကျေးရွာသည် အိမ်ခြေ ၁၈၀ကျော်ရှိပြီး လူဦးရေ ၁,၀၀၀ ခန့်ရှိကာ ယခုအခါရွာလုံးကျွတ် ဘေးလွတ်ရာထွက်ပြေးတိမ်းရှောင်နေရကြောင်း ဒေသခံများက ပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)