ကချင်ပြည်နယ်ရှိ မြစ်ဆုံဆည်စီမံကိန်း အပြီးတိုင်ရပ်ဆိုင်းရေး ဆုတောင်းပွဲကို ယနေ့နံနက်က မြစ်ဆုံဒေသ၌ ပြုလုပ်ခဲ့ကြောင်း ဒေသခံတစ်ဦးက ပြောသည်။
မြစ်ဆုံစီမံကိန်း ယာယီရပ်ဆိုင်းမှု (၁၁)နှစ်ပြည့် အထိမ်းအမှတ်အဖြစ် အောင်တိုဘာ ၁၀ရက်တွင် ကျင်းပခဲ့ခြင်းဖြစ်သည်။
“မြစ်ဆုံရေကာတာရပ်စဲတာ ဦးသိန်းစိန် လက်ထက်ကနေ ၁၁နှစ်တောင်ရောက်ပြီ။ အဲဒါ ဒီအထိ အဲဒီမှာ ကျွန်တော်တို့ တောင်ယာတွေ လုပ်စားလို့ရတာတော့ ဘုရားသခင်ကျေးဇူးကို ချီးမွှမ်းတာပဲ။ ဘယ်လိုပဲဖြစ်ဖြစ် ရပ်ဆိုင်းထားတာလည်းကြာပြီ အခုတော့ထာ၀ရ ရပ်ဆိုင်းဖို့တော့ မျှော်လင့်နေတာပဲ ဒါအချိန်တော့ တန်ပြီ”ဟု ဆုတောင်းပွဲ၌ ပါဝင်သည့်ဒေသခံတစ်ဦးက ပြောသည်။
ထို့ပြင် ယခုနှစ်တွင် တောင်ယာစပါးတွေ စိုက်ခင်းများ၌ ကြွက်များ ကျရောက်၍ တောင်ယာစပါး ပျက်စီးမှု ဖြစ်ပေါ်ခဲ့ခြင်းနှင့်ပတ်သက်ပြီး ဆုတောင်းမှု ပြုလုပ်ခဲ့သည်ဟုလည်း ၎င်းက ဆိုသည်။
ဒေသခံများသည် မြစ်ဆုံရေအားလျှပ်စစ်ဆည်စီမံကိန်း အပြီးတိုင်ရပ်တန့်ရေး၊ ဧရာ၀တီမြစ် ထာ၀ရ တည်တံ့ရေး၊ ဧရာ၀တီမြစ်လွတ်လပ်စွာ ထာ၀စဉ် စီးဆင်းရေး၊ ဒေသခံများ မိမိတို့ နေရပ်သို့ လုံခြုံဘေးကင်းစွာ ပြန်လည်အခြေချနေထိုင်နိုင်ရေး တောင်းဆိုဆန္ဒထုတ်ဖော်ခဲ့သည်။
ပြည်သူအကျိုးမပြုသော စီမံကိန်းများ အလိုမရှိကြောင်းလည်း ဆုတောင်းပွဲ၌ ဆန္ဒထုတ်ဖော်ပြသခဲ့သည်။ယခု ဆုတောင်းပွဲသို့ ဒေသခံ ၇၀ခန့်တက်ရောက်ခဲ့သည်ဟု ဆိုသည်။
