ရွှေဈေးကျဖို့ လုံးပမ်းနေတဲ့ စစ်ကောင်စီဟာ ရွှေဆိုင်တွေကို ဆိုင်ရဲ့ လူမှုကွန်ရက်တွေမှာ ဈေးကွက်ပေါက်ဈေးမဖော်ပြဖို့ဖိအားပေးလာတာတွေ့ရှိတယ်လို့ စုံစမ်းသိရပါတယ်။
ရန်ကုန်မြို့က နာမည်ကြီးရွှေဆိုင်အချို့ကလည်း ဒီရက်ပိုင်း အခြေအနေအခက်အခဲ အချို့ကြောင့် အရင်လို ရွှေ ဈေးနှုန်း အချိန်နဲ့တပြေးညီ မဖော်ပြနိုင်တာကို သည်းခံပေးကြဖို့ ပြီးခဲ့တဲ့ နာရီပိုင်းက တောင်းပန်လာကြတာတွေ့ရပါတယ်။
ရွှေဈေးနှုန်းကို အရင်ကလို မဖော်ပြနိုင်တဲ့အကြောင်းရင်းကိုတော့ မပြောထားကြပါဘူး။
ဒီလို ရွေဆိုင်တွေကို ဖိအားပေးလာတဲ့အချိန်ဟာ ရွှေဈေးကျဖို့ စစ်ကောင်စီ က ရန်ကုန်နဲ့မန္တလေးမှာ ရွှေအသင်းတွေကတဆင့် ရွှေရောင်းချခိုင်းထားတဲ့အချိန်လည်းဖြစ်ပါတယ်။
ရန်ကုန်နဲ့မန္တလေးမှာ ရွှေလုပ်ငန်းရှင်အသင်းတွေဟာ ပြီးခဲ့တဲ့ ရက်ပိုင်းကစတင်ပြီး လူတစ်ဦးကို ၁၀ ကျပ်သားအထိ စတင်ရောင်းချပေးလာပါတယ်။
ဒါပေမယ့် ဈေးနှုန်းကတော့ အဲဒီ ရွှေအသင်းတွေကိုယ်တိုင် သတ်မှတ်ကြေညာထားတဲ့ ကျပ်သိန်း ၂၀ အောက်ဝန်းကျင်ဈေးနှုန်းမဟုတ်ဘဲ တစ်ကျပ်သား ၂၅ သိန်းကျပ်ဝန်းကျင်နဲ့ ရောင်းချတာတွေ့ရပါတယ်။
ရွှေအသင်းဆီကနေ ရွှေ ၁၀ ကျပ်သား ဝယ်တဲ့အခါ ကျပ်သိန်း ၂၀၀ ကျော်တဲ့အတွက် ဘဏ်ကိုငွေသွင်းပြီးမှ ဝယ်ယူခွင့်ရတယ်လို့ သွားရောက်ဝယ်ယူခဲ့သူတစ်ဦးဆီက သိရပါတယ်။
စစ်တပ်အာဏာသိမ်းပြီးနောက် တိုင်းပြည်ရဲ့ စီးပွားရေးဟာ ဆုတ်ယုတ်သွားပြီး ကျပ်ငွေ တန်ဖိုးကျဆင်းသွားတာနဲ့အတူ ရွှေ ဈေး နဲ့ ဒေါ်လာဈေးဟာ စံချိန်အထပ်ထပ်ချိုးပြီး မြင့်တက်ခဲ့တာပါ။
