မြေပြင်၌ တိုက်ပွဲဝင်နေသည့် ရဲဘော်များ၏လုံခြုံရေးအတွက် တိုက်ပွဲသတင်းများအား အလျင်စလို အွန်လိုင်းပေါ်မတင်ကြရန် ချင်းအမျိုးသားတပ်မတော် (CNA) တပ်မှူး ဗိုလ်မှူးကြီး ဆော်လမွန်က ပြောကြားသည်။
အောက်တိုဘာ ၁၄ရက်က ပြုလုပ်သည့် အွန်လိုင်းစကားဝိုင်းဆွေးနွေးပွဲ တစ်ရပ်တွင် ဗိုလ်မှူးကြီး ဆော်လမွန်က ထိုသို့ ပြောကြားခဲ့ခြင်းဖြစ်သည်ဟု The Chin Journalက ဖော်ပြထားသည်။
“ စစ်ပွဲဆိုတာ မဟာဗျူဟာ ကျကျနဲ့ဆင်နွှဲတာဖြစ်တဲ့အတွက် အွန်လိုင်း မီဒီယာမှာအလျင်စလို တင်တဲ့ဟာတွေကို ရန်သူက ပြန်ပြီးအသုံးပြုတာတွေရှိတယ်။ တိုက်ပွဲဖြစ်ပွားနေစဉ် အဲလို သတင်းတင်တဲ့ သူတွေဖက်က ပြည်သူတွေကို အကျိုးပြုတယ်လို့ မိမိကိုယ်ကိုယ် ခံယူနိုင်ပေမယ့် မြေပြင်ကရဲဘော်တွေအတွက် အသက်ဆုံးရငံးတာတွေဖြစ်နိုင်တယ်”ဟု ဗိုလ်မှူးကြီး ဆော်လမွန်က ပြောကြားကြောင်း ဖော်ပြထားသည်။
CNA တပ်မှ တရားဝင်သတင်းထုတ်ပြန်မှုကို စောင့်ဆိုင်းရန်နှင့် တပ်ဖွဲ့ပြောရေးဆိုခွင့်ရှိသူ များ၏ တရားဝင် ပြောဆိုမှုများကိုစောင့်ပေးရန် ဗိုလ်မှူးကြီး ဆော်လမွန်က ပြောကြားခဲ့သည်ဟုဆိုသည်။
ယခုရက်ပိုင်းအတွင်း၌ ဟားခါးနှင့် ထန်တလန်ကြား၌တိုက်ပွဲဖြစ်ပွားခဲ့ရာ စ်ကောင်စီတပ်၏ တိုက်ခိုက်မှုကြောင့် CNA ရဲဘော် သုံးဦး ကျဆုံးခဲ့ကြောင်း The Chin Journalက ဖော်ပြထားသည်။
ချင်းအမျိုးသားတပ်ဦး(CNF)၏ တပ်ဖွဲ့ဖြစ်သည့် CNA အနေဖြင့် ချင်းပြည်နယ်အတွင်းနှင့် ဆက်စပ်ဒေသများ၌ ဒေသခံ ချင်းကာကွယ်ရေးတပ်(CDF)နှင့် ပူးပေါင်းပြီး စစ်ကောင်စီတပ်ကို တိုက်ခိုက်လျက်ရှိသည်။
