ဧရာဝတီတိုင်း အင်္ဂပူမြို့၏ အကြီးဆုံးစာသင်ကျောင်းဖြစ်သော အင်္ဂပူအထက်တန်းကျောင်းသည် ယနေ့နံနက် အစောပိုင်းတွင် မီးလောင်ပျက်စီးသွားခဲ့သည်။
၅တန်းမှ ၁၀တန်းအထိစာသင်ခန်းအများအပြားရှိသော အင်္ဂပူအထက်တန်းကျောင်းသည် ယနေ့(အောက်တိုဘာလ၁၆ရက်)နံနက် ၂နာရီခန့်မှ စတင်ကာ မီးလောင်ခဲ့ခြင်းဖြစ်သည်။
“ဘာကြောင့်လောင်တာလဲတော့မသိဘူး။ တစ်ကျောင်းလုံးနီးပါးလောင်တာ။ ၁၀တန်း Aခန်းနဲ့ Bခန်းရယ် ငုရွှေဝါခန်းမရယ်ကလွဲရင်အကုန်းလောင်တာ”ဟု ကျောင်းသားဟောင်းတစ်ဦးကပြောသည်။
အနီးပတ်ဝန်းကျင်မြို့များဖြစ်သည့် ဟင်္သာတ၊ထူးကြီး၊မဲဇလီကုန်း၊မြန်အောင်နှင့် ကွင်းကောက်မြို့များမှ မီးသတ်ကားများ လာရောက်ငြိမ်းသတ်ခဲ့သော်လည်း မီးလောင်ကျွမ်းအားကောင်း၍ ပျက်စီးမှုများခဲ့ကြောင်း ဒေသခံများက ပြောသည်။
မီးလောင်ရသည့် အကြောင်းရင်းကို မသိရသေးပေ။ အင်္ဂပူမြို့အထက်တန်း ကျောင်းသည် ၁၉၇၀ ကတည်ဆောက်ခဲ့သော သက်တမ်းရင့်ကျောင်းတစ်ကျောင်းဖြစ်သည်။
