တနင်္သာရီတိုင်း ထားဝယ်မြို့နယ် ၊ (၈)မိုင်နှင့် ဥယျာဥ်ကြီးရွာကြားရှိတံတားပေါ်တွင် စစ်ကောင်စီတပ်ခြေကျင်စစ်ကြောင်းအား မိုင်းဆွဲတိုက်ခိုက်ခဲ့ကြောင်း Dawei Defense Team – DDT တပ်ဖွဲ့က ပြောသည်။
ယမန်နေ့(အောက်တိုဘာ ၁၅ ရက်)နံနက် ၄ နာရီ ၁၀ မိနစ်ခန့်က အကြမ်းဖက်စစ်ကောင်စီ ခြေကျင် စစ်ကြောင်းကို DDT(ထားဝယ်- ပကဖ)ရဲဘော် များ ကြားဖြတ်မိုင်းဆွဲခြင်းနှင့် ပစ်ခတ်တိုက်ခိုက် ခြင်းများ လုပ်ဆောင်ခဲ့သည်ဟု ဆိုသည်။
တိုက်ခိုက်မှုတွင် မိုင်းလုံးပေါက်ကွဲပြီး တစ်လုံးချို့ယွင်းမှုဖြစ်ခဲ့၍ ၁၅မိနစ်ကြာ အပြန်အလှန်ပစ်ခတ် မှုဖြစ်ပွားပြီး စစ်ကောင်စီတပ်မှ ငါးဦးသေဆုံးကာ အများအပြားဒဏ်ရာရရှိပြီးနောက် လက်နက်ကြီးများဖြင့်ပြန်လည်ပစ်ခတ်သဖြင့် တော်လှန်ရေးရဲဘော်များ ဘေးကင်းစွာ ပြန်ဆုတ်လာခဲ့ရကြောင်း DDT တပ်ဖွဲ့က ပြောသည်။
“ဒဏ်ရာရတဲ့စစ်သားတွေလည်း ဆေးရုံရောက်မှထပ်ဆုံးတယ်လို့သိရပေမယ့် အတည်ပြုဖို့ ဆက် စုံစမ်းနေပါတယ်”ဟု DDT(ထားဝယ်-ပကဖ)မှ တော်လှန်ရေးရဲဘော်တစ်ဦးက ဆိုသည်။
တိုက်ခိုက်မှုဖြစ်ပွားပြီးနောက် စစ်ကောင်စီတပ်က ဥယျာဥ်ကြီးကျေးရွာမှ ဒေသခံပြည်သူသုံးဦးကို ဖမ်းဆီးနှိပ်စက်ခဲ့ပြီး စစ်ကြောင်းပြန်ထွက်ချိန်တွင်မှ ပြန်လွှတ်ပေးခဲ့ကြောင်း အထက်ပါရဲဘော်က ပြောသည်။
ထို့အပြင် စစ်ကောင်စီတပ်စစ်ကြောင်းသည် ဥယျာဥ်ကြီးကျေးရွာမှတဆင့် အညာဖျားရွာသို့ဝင်ရောက်ရာတွင် လက်နက်ကြီးများဖြင့် ရမ်းသမ်းပစ်ခတ်ခဲ့ရာ နယ်မြေရှင်းလင်းရေးလုပ်ဆောင်ချိန် မပေါက်ကွဲသေးသည့် လက်နက်ကြီးအချို့ကို တော်လှန်ရေးရဲဘော်များက သိမ်းဆည်းရရှိခဲ့သည်။
