ချင်းပြည်နယ် ကန်ပက်လက်နယ်သို့ အင်အားဖြည့်တင်းရန်လာသည့် စစ်ကောင်စီပို့ဆောင်ရေး ရဟတ်ယာဉ် နှစ်စီးအားလက်နက်ငယ်များဖြင့် စောင့်ကြိုပစ်ခတ်တိုက်ခိုက်ခဲ့ရာ တစ်စီးကိုထိမှန်ခဲ့ကြောင်း ကန်ပက်လက်ချင်းဒေသကာကွယ်ရေးတပ်(CDF)မှတာဝန်ရှိသူတစ်ဦးကပြောသည်။
စစ်ကောင်စီ ရဟတ်ယာဉ် နှစ်စီးသည် ယနေ့(အောက်တိုဘာ ၁၆ ရက်)က ကန်ပက်လက်မြို့ကို အင်အားဖြည့်တင်းရန်လာစဉ် ချင်းတောင်အမြင့်တနေရာမှ စောင့်ကြိုပစ်ခတ်ခြင်းခဲ့ရာက တစ်စီးမှာ ဆီတိုင်ကီပေါက်သွားသည့် အပြင်ပန်ကာတစ်ချောင်း ကျိုးသွားခဲ့သည်ဟု CDF(ကန်ပက်လက်)ကထုတ်ပြန်ထားသည်။
“မနက်ပိုင်းတစ်ကြိမ်လူလာချပြီးပြန်သွားတယ်။ ဒုတိယအကြိမ်ထပ်လာတဲ့အချိန်မှာ အသင့်စောင့်ပြီးပစ်လိုက်တာပါ” ဟု CDF(ကန်ပက်လက်) တာဝန်ရှိသူတစ်ဦးကပြောသည်။
ရဟတ်ယာဉ်မှာ ပျက်ကျသွားခြင်းမရှိသော်လည်းတစ်စီးမှာ ဆီတိုင်ကီပေါက်သွားပြီး တောင်ပံပါပျက်သွား၍ပျံသန်းနိုင်ခြင်းမရှိတော့ကြောင်း ၎င်းကဆက်ပြောသည်။ရဟတ်ယာဥ်အားပစ်ခတ်တိုက်ခိုက်မှုအပြီးတွင် စစ်ကောင်စီတပ်က ကန်ပက်လက်မြို့ပေါ်တွင် လက်နက်ကြီး၊ လက်နက်ငယ်များဖြင့် ရမ်းသန်းပစ်ခတ်နေသည်ဟုလည်း အထက်ပါတာဝန်ရှိသူကဆက်ပြောသည်။
ကန်ပက်လက်မြို့နယ် ကျင်ဒွေး တပ်စခန်းသို့စစ်ကောင်စီတပ်က အောက်တိုဘာ ၁၅ ရက်ကလည်း ရဟတ်ယာဉ် ၂စီးဖြင့် စစ်အင်အား ဖြည့်တင်းခဲ့ပြီး၊ ယနေ့တွင်လည်းရဟတ်ယာဉ် ၂စီးဖြင့် စစ်အင်အားဖြည့်တင်းစဥ်စောင့်ကြိုတိုက်ခိုက်ခဲ့ခြင်းဖြစ်သည်။
စစ်ကောင်စီတပ်သည် ကန်ပက်လက်မြို့အတွင်းစစ်အင်အားများကိုနည်းလမ်းပေါင်းစုံဖြင့် ဖြည့်တင်းနေ၍ တိုက်ပွဲအချိန်မရွေးဖြစ်ပွားနိုင်ကြောင်းCDF(ကန်ပက်လက်)တာဝန်ရှိသူက သတိပေးထားသည်။ ထိုကြောင့်စစ်ကောင်စီတပ်သည် အင်အားသုံးစစ်ကြောင်း ထိုးလာနိုင်၍ ပြည်သူများ အသွားအလာဂရုစိုက်ကြရန်လည်းCDF(ကန်ပက်လက်)က သတိပေးထားသည်။
