ရန်ကုန်မြို့ လှိုင်မြို့နယ်တွင် ခွင့်ဖြင့်ပြန်လာသည့် စစ်ကောင်စီတပ်မှ ဗိုလ်ကြီးအဆင့်ရှိသူ အပါအဝင်သုံးဦး ပစ်သတ်ခံရကြောင်း ဒေသခံသတင်းရင်းမြစ်များက ပြောသည်။
ယနေ့ နံနက် ၉နာရီ ခွဲခန့်က သီရိမြိုင် (၁၃)ရပ်ကွက်၊ဗဟိုလမ်းနှင့် ပေါင်းစီးလမ်းထောင့်တွင် ပစ်သတ်ခံရခြင်းဟု ဆိုသည်။
“သူက သိရသလောက် တပ်ထဲမှာ ၁၀ နှစ်ကျော်နေပြီ။ရှမ်းပြည်ဘက်က ပြီးခဲ့တဲ့ နှစ်ရက်၊သုံးရက်လောက်ကမှ သူတို့အမေ အိမ်ပြန်လာတာ။ဒီမနက်တော့ လမ်းလျှောက်နေရင်း သူ့မိန်းမနဲ့သူတို့နဲ့ပါလာတဲ့ သူတစ်ယောက်ပါ ပစ်သတ်ခံရတာ ။သုံးယောက် စလုံးနေရာမှာတင်သေတယ် “ဟု လှိုင်မြို့နယ်တွင် နေထိုင်သူတစ်ဦးက လူထုနွေဦးသို့ ပြောသည်။
ယခု ပစ်ခတ်ရှင်းလင်းမှု ဖြစ်စဥ်နှင့်ဆက်စပ်၍ မည်သည့်အဖွဲ့က ဆောင်ရွက်သည်ကို မသိရသေးပေ။
လက်ရှိတွင် အကြမ်းဖက်စစ်ကောင်စီတပ်က အခင်းဖြစ်နေရာ ဗဟိုလမ်းအားပိတ်ဆို့စစ်ဆေးနေပြီး ပါရမီလမ်းတစ်လျှောက်ကင်းပုန်းများပါချထားကြောင်းလည်း မျက်မြင်တွေ့ရှိသူများက အသိပေးသည်။
ယခုရက်ပိုင်းအတွင်း ရန်ကုန်မြို့၌ မြို့ပြတော်လှန်ရေးအင်အားစုများက စစ်ကောင်စီတပ်နေရာများကို ပိုမိုတိုက်ခိုက်လျက်ရှိနေသည်။
သို့သော် ယမန်နေ့က အင်းစိန်ထောင်တွင်ပေါက်ကွဲမှုနှင့် ပစ်ခတ်မှုများတွင် ပြည်သူအချို့သေဆုံးခဲ့ရသည့်ဖြစ်စဥ်တွင် ပြုလုပ်ခဲ့သူများအပေါ် ဝေဖန်မှုများရှိခဲ့သည်။
