မကွေးတိုင်း၊ ရေစကြိုမြို့နယ်နှင့် စစ်ကိုင်းတိုင်း မြင်းမူမြို့နယ်အတွင်းရှိ လမ်းပိုင်းအချို့အား ဒေသကာကွယ်ရေးအဖွဲ့များက ယာယီပိတ်ထားလိုက်သည်။
ယနေ့(အောက်တိုဘာလ ၂၄ ရက်) နံနက်ပိုင်းမှစတင်ကာ ရေစကြိုမြို့နယ် အောင်မိုးလမ်းခွဲမှ မြိုင်မြို့နယ် လင်းကတော လမ်းပိုင်းအား ယခုကြေညာချက်ထုတ်ပြန်ချိန်မှစ၍ နောက်ထပ်ကြေညာချက်တစုံတရာမထုတ်ပြန်မီအထိ အရေးပေါ်လိုအပ်ချက်အရ ယာယီပိတ်ထားလိုက်ကြောင်း ရေစကြိုမြို့နယ်ပြည်သူ့ကာကွယ်ရေးတပ်ဖွဲ့က သတင်းထုတ်ပြန်သည်။
ယာယီပိတ်ထားချိန်အတွင်း ကြေညာချက်ပါလမ်းပိုင်းကိုပြည်သူတို့၏ လုံခြုံရေးအတွက် လုံးဝအသုံးမပြုကြပါရန်နှင့် လိုက်နာခြင်းမရှိသူတို့၏လုံခြုံရေးအတွက်အာမမခံကြောင်း ရေစကြိုမြို့နယ်ပြည်သူ့ကာကွယ်ရေးတပ်ဖွဲ့က အသိပေးသည်။
ထို့အပြင် အိမ်စီးကားများ ခရီးသည်တင်ကားများအပါအဝင်မည်သည့်ကားမျှ ဖြတ်သန်းခွင့်ပြုမည်မဟုတ်ဘဲ အရေးပေါ်သွားလာလိုလျှင် မော်တော်ဆိုင်ကယ်ဖြင့်သာ သွားလာကြပါရန်နှင့်အဆိုပါလမ်းပိုင်းကိုလက်ရှိအသုံးပြုလျက်ရှိသော မိမိ၏ဆွေမျိုးမိတ်ဆွေများကို ထပ်ဆင့်အကြောင်းကြားပေးရန် ရေစကြို(ပကဖ)အဖွဲ့ကမေတ္တာရပ်ခံသည်။
အောက်တိုဘာ ၂၁ ရက်က မြိုင်မြို့နယ် လင်းကတောစခန်းအား ဒေသကာကွယ်ရေးအဖွဲ့များက သွားရောက်တိုက်ခိုက်ခဲ့ပြီး စစ်ကောင်စီတပ်သား ခုနစ်ဦးသေဆုံးခဲ့ကြောင်း သတင်းထုတ်ပြန်ထားသည်။
အလားတူ စစ်ကိုင်းတိုင်း၊ ထီးဆောင်း – အရာတော်လမ်းနှင့် မုံရွာ – မြင်းမူ – မန္တလေးလမ်းများအားအသုံးပြုခြင်းမပြုရန် GTR-MMU အဖွဲ့က မေတ္တာရပ်ခံသတိပေးထားသည်။
အဆိုပါ လမ်းပိုင်းများ၌လည်း စစ်ကောင်စီယာဥ်များဖြတ်သန်းသွားတိုင်း ဒေသကာကွယ်ရေးအဖွဲ့များက မိုင်းဆွဲတိုက်ခိုက်လေ့ရှိသည်။
