မြန်မာစစ်တပ်သည် အရပ်သားပြည်သူများကို အကာအကွယ်ပေးရန် တာဝန်ရှိမှုကို အလေးမထားကြောင်း နိုင်ငံတကာသံတမန်များက ယနေ့ ပူးတွဲကြေညာသည်။
မြန်မာနိုင်ငံတွင်းနှင့် ဒေသတွင်းကြုံတွေ့နေရသော အကျပ်အတည်းနှင့် မတည်ငြိမ်မှုများအတွက် စစ်အာဏာရှင်အဖွဲ့အစည်းတွင် တာဝန်ရှိကြောင်း နိုင်ငံပေါင်း ၁၅ နိုင်ငံမှ သံအမတ်ကြီးများ၊ သံရုံးတာ၀န်ခံများနှင့် ဥရောပသမဂ္ဂမစ်ရှင်အကြီးအကဲတို့က ကြေညာခြင်းဖြစ်သည်။
မြန်မာနိုင်ငံမြောက်ပိုင်း၊ ကချင်လူထုစုဝေးမှုတစ်ခုကို စစ်တပ်က လေကြောင်းတိုက်ခိုက်မှုပြုလုပ်ခဲ့ခြင်းကြောင့် လူအများအပြား အသက်ဆုံးရှုံးကြရသည့်သတင်းကို မိမိတို့ကြားသိရပြီး အဆင်ခြင်မဲ့တိုက်ခိုက်မှုများကြောင့် အပြစ်မဲ့အရပ်သားများ ထိခိုက်ခြင်း၊ အတိဒုက္ခခံစားရခြင်းများ နိုင်ငံတဝန်းဖြစ်ပေါ်လျက်ရှိကြောင်း ပူးတွဲကြေညာချက်၌ ဖော်ပြသည်။
ကချင်ပြည်နယ် ဖားကန့်၌ စစ်တပ်က လေကြောင်းမှတိုက်ခိုက်မှုနှင့်ပတ်သက်၍ နိုင်ငံတကာအသိုက်အဝန်းအနေဖြင့် မြန်မာပြည်သူများကို အကာအကွယ်ပေးရန်လုပ်ဆောင်ရမည်ဖြစ်ပြီး မြန်မာစစ်တပ်ခေါင်းဆောင်များကို တရားမျှတမှုအတွက် စီရင်ခြင်းပြုရမည်ဟု ကုလသမဂ္ဂကျွမ်းကျင်သူများနှင့်ဖွဲ့စည်းထားသော မြန်မာနိုင်ငံဆိုင်ရာအထူးအကြံပေးကောင်စီ(SAC-M)က ထုတ်ပြန်တောင်းဆိုထားသည်။
