ကရင်နီ(ကယား)ပြည်နယ် ဖရူဆိုမြို့အနီးရှိ နေအိမ်များနှင့် ဘာသာရေးအဆောက်အဦးများကို အကြမ်းဖက်စစ်ကောင်စီက လက်နက်ကြီးများဖြင့် ရည်ရွယ်ချက်ရှိရှိ ပစ်ခတ်နေကြောင်း PDF ဖရူဆိုက ယနေ့(အောက်တို ဘာ ၂၅ ရက်) အသိပေး ထုတ်ပြန်သည်။
ထို့ကြောင့် ကင်းထောက်၊ကင်းစောင့်မှုများဖြင့် နေ့ညမပြတ် အသင့်လုံခြုံရေးယူထားသည်ဟု အသိပေးသည်။
“ဖရူဆိုမှာက လွန်ခဲ့တဲ့သုံးရက်လောက်က တိုက်ပွဲ ပြင်းထန်ထားတယ်။ပြီးတော့ အရင်လပိုင်းက တည်းက တိုက်ပွဲတော်တော်ဖြစ်ခဲ့တယ်။နောက်တစ်ခုက သူတို့ ဘက်က စစ်ကြောင်းထွက်ချင်လို့ နယ်မြေရှင်းတဲ့ ပုံစံမျိုးနဲ့ ပစ်ခတ်တာမျိုးလို့ ယူဆနိုင်တယ်”ဟု ကရင်နီစစ်ရေးသတင်းရင်းမြစ်က လူထုနွေဦးသို့ ပြောသည်။
အောက်တိုဘာ ၂၂ ရက်က ဖရူဆိုမြို့မရဲစခန်းအပါအဝင် စစ်ကောင်စီတပ်စွဲနေရာများကို တိုက်ခိုက်ခဲ့ကြောင်း ကရင်နီအမျိုးသားများကာကွယ်ရေးတပ် (KNDF)က ထုတ်ပြန်ထားသည်။
အဆိုပါ တိုက်ပွဲအတွင်း စစ်ကောင်စီဖက်မှ တစ်ဦးသေဆုံးကာ ထိခိုက်ဒဏ်ရာရရှိသူအများအပြားရှိပြီး လက်နက်ကြီးကျည်ကြောင့် ကရင်နီပူးပေါင်းတပ်ဖွဲ့၏ ဝံပုလွေပြောက်ကျားတပ်ဖွဲ့မှ ရဲဘော်တစ်ဦး ကျဆုံးခဲ့ရသည်။
အကြမ်းဖက်စစ်ကောင်စီတပ်သည် ဒီးမော့ဆို – ဖရူဆို လမ်းမကြီးကို ထိန်းချုပ်ရန်ကြိုးပမ်းနေပြီး ယခင်လအတွင်း၌ပင် ဖရူဆိုမြို့နယ်အတွင်း ထိတွေ့တိုက်ပွဲ ၁၄ကြိမ်ထက်မနည်းဖြစ်ပွားခဲ့သည်။
