ကရင်နီပြည်နယ် လွိုင်ကော်မြို့တွင် ကင်းလှည့်နေသည့် နယ်ထိန်းရဲတစ်ဦး ပစ်သတ်ခံရကြောင်း ဒေသခံသတင်းရင်းမြစ်များက ပြောသည်။
နယ်ထိန်းရဲ သန့်ဇော်ဦးသည် ယနေ့ (အောက်တိုဘာ ၂၅ ရက်) နံနက် ၁၀နာရီခွဲခန့်က ပန်ကန်းရပ်ကွက်အတွင်းမှာ ပစ်သတ်ခံရမှုဖြစ်ပွားခဲ့ခြင်းဟု ဆိုသည်။
“ဆိုင်ကယ်မောင်းလာရင်း ပစ်ခံရတာ။ကျည်တွေက ရင်ဘတ်ဖောက်ဝင်ပြီ ပစ်ခံရတဲ့နေရာမှာတင် သေနေတာ”ဟု ဒေသခံတစ်ဦးက ပြောသည်။
အဆိုပါ ပစ်ခတ်မှုကို မည်သူကလုပ်ဆောင်ခဲ့သည်ကို မရှိရသေးပေ။
သို့သော် လွိုင်ကော်မြို့တွင် အကြမ်းဖက်စစ်ကောင်စီလက်အောက်ခံ ရဲများသည် အရပ်ဝတ်များဖြင့် နေ့စဥ် ကင်းလှည့်နေပြီး ၎င်းတို့မသင်္ကာပါက စစ်ဆေးမေးမြန်း၍ ရိုက်နှက်ခံရသူများရှိကြောင်း အထက်ပါဒေသခံက အသိပေးသည်။
ထို့အပြင် လွိုင်ကော်မြို့အတွင်း အကြမ်းဖက်စစ်ကောင်စီတပ်က အရပ်သားဟန်ဆောင်၍ ကင်း ထောက်ခြင်းနှင့် ကင်းပုန်းဝပ်၍ စောင့်ဆိုင်းဖမ်းဆီးမှုများရှိနေကြောင်းလည်း ကရင်နီစစ်ရေးသတင်းရင်းမြစ်က ပြောသည်။
