စစ်ကိုင်းတိုင်း၊ မြောင်မြို့နယ်တွင် ကျောက်ရစ်စခန်းမှလာသော စစ်ကောင်စီတပ်အား ပဒေသာမိုင်းဖြင့် ဖောက်ခွဲတိုက်ခိုက်ရာ စစ်အုပ်စုအထိအခိုက်များနိုင်ကြောင်း နှလုံးလှလူမိုက်ကြီးများအဖွဲ့က ထုတ်ပြန်သည်။
အောက်တိုဘာ ၂၅ ရက်က မြောင်မြို့နယ်၊ ကျောက်ရစ်ကျေးရွာမှထွက်လာသော စစ်ကောင်စီတပ်အား ပဒက်ချောင်းအလွန်တွင် ပဒေသာမိုင်းဖြင့် ဖောက်ခွဲတိုက်ခိုက်ခဲ့ရာ စစ်ကောင်စီဘက်က ထိခိုက်မှုများနိုင်ကြောင်း နှလုံးလှလူမိုက်ကြီးများအဖွဲ့၏ ထုတ်ပြန်ချက်တွင် ဖော်ပြသည်။
“မနေ့ညက စခများပဒေါက်ချောင်းမှ တက်လာတဲ့အချိန်မှာ မိုင်းပဒေသာတစ်စုံခွဲခဲ့တာကြောင့် စခ ၁၀ကောင်နှင့်၁၅ကောင်ကြားထိနိုင်တယ်။ သေမသေတော့အတည်မယူနိုင်သေးပေမဲ့ ညကြည့်စကုဒ်နဲ့ကြည့်လို့သိခဲ့ရပါတယ်။”ဟု နှလုံးလှလူမိုက်ကြီးများအဖွဲ့က အသိပေးသည်။
![သုံးစွဲခဲ့သည့်မိုင်းများအား တွေ့ရစဉ်၊ ဓာတ်ပုံ- နှလုံးလှလူမိုက်ကြီးများအဖွဲ့](https://i0.wp.com/www.ludunwayoo.com/wp-content/uploads/2022/10/313283393_499234945599296_8665074459536526717_n.png?resize=720%2C544&ssl=1)
ကျောက်ရစ်ကျေးရွာမှ အဆိုပါစစ်ကြောင်းသည် ဘေးဝန်းကျင်ကျေးရွာများအား နေ့တိုင်းနီးပါး ဝင်ရောက်ဖျက်ဆီးမီးရှို့ခြင်း၊ ပြည်သူများအား ဖမ်းဆီးနှိပ်စက်ခြင်းများ ပြုလုပ်လေ့ရှိကြောင်း ဒေသခံများက ပြောသည်။
အဆိုပါ စစ်ဆင်ရေးကို နှလုံးလှလူမိုက်ကြီးများအဖွဲ့၊ ဗိုလ်နေတိုးအဖွဲ့၊ 11brother အဖွဲ့တို့ မိုင်းများထောင်ကာ တိုက်ခိုက်ခဲ့ခြင်းဖြစ်ကြောင်း အသိပေးသည်။
ဖြစ်စဉ်နှင့်ပတ်သက်၍ နှလုံးလှလူမိုက်ကြီးများအဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
အောက်တိုဘာ ၂၂ ရက် ညပိုင်းကလည်း ကျောက်ရစ်စခန်းမှ ထွက်လာသော စစ်ကောင်စီတပ်များအား စခန်းအနီး၌ပင် မဟာမိတ်အဖွဲ့များက မိုင်းဆွဲတိုက်ခိုက်ခဲ့သေးသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)