ရန်ကုန်က ရွှေဆိုင်တွေ အခေါက်ရွှေတစ်ကျပ်သား ၂၅ သိန်း ၃သောင်းကျပ်နဲ့ရောင်းဖို့စာထုတ်

ရန်ကုန်တိုင်းအတွင်းက ရွှေဆိုင်တွေအနေနဲ့ အခေါက်ရွှေတစ်ကျပ်သားကို ကျပ် ၂၅ သိန်း ၃သောင်းကျပ် ဈေးနဲ့သာ ရောင်းချဖို့ ရန်ကုန်တိုင်းရွှေလုပ်ငန်းရှင်အသင်းစာထုတ်လိုက်ပါတယ်။

ပြင်ပပေါက်ဈေး တစ်ကျပ်သားကို ၂၆ သိန်းဝန်းကျင်ရှိနေချိန်မှာ ရွှေအသင်းက ခုလိုထုတ်ပြန်လာတာပါ။

ရန်ကုန်တိုင်းရွှေလုပ်ငန်းရှင်အသင်းဟာ သူတို့ အသင်းရဲ့ဖေ့ဘွတ်ခ်မှာတော့ နေ့စဉ်ပေါက်ဈေး ၁၉ သိန်း ဝန်းကျင်သာရှိတယ်လို့ နေ့စဉ်ဖော်ပြပေမယ့် ဒီဈေးဟာ ဈေးကွက်မှာ အလုပ်မဖြစ်တဲ့ ဈေးသာဖြစ်ပါတယ်။

စစ်ကောင်စီဟာ ဒေါ်လာဈေးနဲ့ ရွှေဈေးကို ထိန်းချုပ်ဖို့အတွက် ဒေါ်လာပေါက်ဈေးတင်နေတဲ့ လူမှုကွန်ရက်တွေကို အမှုဖွင့်တာရှိသလို ရွှေဆိုင်တွေကိုလည်း ပေါက်ဈေးမတင်ဖို့ ဖိအားပေးတာတွေရှိနေပါတယ်။