ကရင်နီ(ကယား)ပြည်နယ်၊ ရှားတောမြို့နယ်၊ ပွန်ချောင်းကျေးရွာအနီးရှိ စစ်ကောင်စီ၏ ခြေကုပ်စခန်းကို ထိရောက်စွာ တိုက်ခိုက်နိုင်ခဲကြောင်း ကရင်နီအမျိုးသားများကာကွယ်ရေးတပ်(KNDF)တပ်ရင်း – ၁၄က ယနေ့(အောက်တိုဘာ ၃၀ရက်) ထုတ်ပြန်သည်။
စစ်ကောင်စီခြေကုပ်စခန်းကို ယခုလ ၂၇ရက် နံနက်ပိုင်းက ကရင်နီတပ်မတော်(KA)နှင့်အတူ ပူးပေါင်းတိုက်ခိုက်ခဲ့ကြောင်း ဖော်ပြသည်။
ထိတွေ့တိုက်ပွဲမှာ မိနစ် ၄၀ကျော်ကြာမြင့်ခဲ့ပြီး အပြန်အလှန် ပစ်ခတ်မှုများအတွင်း စစ်ကောင်စီ၏ ခြေကုပ်စခန်းထဲရှိ ပစ်မှတ်အချို့အား ပူးပေါင်းတပ်များမှ ထိရောက်စွာ ပစ်ခက်တိုက်ခိုက်နိုင်ခဲ့သည်ဟု ဆိုသည်။
သို့သော် စစ်ကောင်စီတပ်၏ ထိခိုက်သေဆုံးမှုကို အတည်ပြု၍မရသေးကြောင်း KNDFက ပြောသည်။
“ပွန်ချောင်းရွာမှာက စကစက အနည်းဆုံး ၅၀ လောက်တပ်စွဲထားတာ။အဲဒီနေရာကို အခုလ ဒုတိယပတ်လောက်က ပထမတစ်ကြိမ်ဝင်တိုက် သေးတယ်။အဲဒီတုန်းကလည်း စကစ အထိနာတယ်။နောက်ပြီး ရှားတောဆိုတာ KA ရဲ့ နယ်မြေကျွမ်းကျင်မှုထဲပါပြီသား”ဟု ကရင်နီစစ်ရေးသတင်းရင်းမြစ်က လူထုနွေဦးသို့ ရှင်းပြသည်။
တိုက်ပွဲတွင် ကရင်နီပူးပေါင်းတပ်မှ ထိခိုက်မှုတစ် စုံတစ်ရာမရှိ ပြန်လည်ဆုပ်ခွာနိုင်ခဲ့ကြောင်း အသိပေးသည်။
ထိတွေ့တိုက်ပွဲအပြီး စစ်ကောင်စီမှ ၎င်းတို့၏ ခြေကုပ်စခန်းတွင်းမှ ရမ်းသမ်းပစ်ခတ်သော လက်နက်ကြီး ထိမှန်ကာ ပွန်းချောင်းကျေးရွာရှိ လူနေအိမ်တစ်လုံး ထိခိုက်ပျက်ဆီးမှုလည်း ရှိခဲ့ကြောင်း ထုတ်ပြန်ချက်၌ ဖော်ပြသည်။
