တနင်္သာရီတိုင်း၊ ပုလောမြို့နယ် ကျောင်းနိမ့်ကျေးရွာအား စစ်ကောင်စီတပ်က ဒရုန်းဖြင့် ဗုံးသီးခြောက်လုံးချ၍ ကျေးရွာနေလူထုအား တိုက်ခိုက်ခဲ့ကြောင်း မြိတ်ခရိုင်တပ်ရင်း (၁)PPDF က ပြောသည်။
ယနေ့(အောက်တိုဘာ ၃၁ရက်)မွန်းလွဲ ၃ နာရီ ၁၅မိနစ်ခန့်က ပြည်သူ့ကာကွယ်ရေးတပ်မတော် မြိတ်ခရိုင်တပ် ရင်း(၁)က စခန်းချ လုံခြုံရေး ယူပေးထားသော ပုလောမြို့နယ် ကျောင်းနိမ့်ကျေးရွာသို့ စစ်ကောင်စီ၏ တပ်ရင်း(၂၈၅ )မှ ဒရုန်းဖြင့် ဗုံးသီး (၆)လုံး လာရောက်ချကာ တိုက်ခိုက်ခဲ့ခြင်းဖြစ်သည်ဟု ဆိုသည်။
“(ကာကွယ်ရေးတပ်ဖွဲ့များက ပြန်လည်ပစ်ခတ်တာ)မရှိဘူးဗျ။ လာပြီး လက်တည့်စမ်းတဲ့သဘောပါ။ ဒီနေ့ ဒရုန်းနဲ့ ထပ်ပြီးရောက်လာသေးတယ်”ဟု မြိတ်ခရိုင် တပ်ရင်း (၁)မှ တော်လှန်ရေးရဲဘော်တစ်ဦးက ပြောသည်။
စစ်ကောင်စီတပ်၏ ဒရုန်းဖြင့်ဗုံးသီးချတိုက်ခိုက်မှုတွင် တော်လှန်ရေးရဲဘော်များ အပါအဝင် ပြည်သူများထိ ခိုက်မှုမရှိခဲ့ဘဲ နေအိမ်တစ်လုံးသာ အနည်းငယ်ထိခိုက်ခဲ့ကြောင်း ၎င်းရဲဘော်က ဆက်ပြောသည်။
ပုလောနယ် ကျောင်းနိမ့်ကျေးရွာသည် စစ်ကောင်စီ (၂၈၅)တပ်ရင်းအခြေစိုက်သည့်နေရာနှင့် တစ်မိုင်ခန့်သာ ကွာဝေးပြီး ပြည်သူအများအနေဖြင့် ဂရုစိုက်သွားလာနေထိုင်ကြရန် မြိတ်ခရိုင် တပ်ရင်း (၁)က မေတ္တာရပ်ခံထားသည်။
