စစ်ကောင်စီထောက်တိုင်များကို နောက်ဆုံးအကြိမ်သတိပေးသည့် အနေဖြင့် လောင်းကစားဝိုင်းလုပ်သည့် စစ်ကောင်စီသတင်းပေး၏ နေအိမ်ကို အဝေးထိန်းဗုံးဖြင့် ဖောက်ခွဲတိုက်ခိုက်ခဲ့ကြောင်း မြောက်ဥက္ကလာပမြို့နယ် ပြည်သူ့ကာကွယ်ရေးတပ်ဖွဲ့တပ်ခွဲ (၁)တာဝန်ခံ အက္ခရာက ပြောသည်။
ရန်ကုန်မြို့ မြောက်ဥက္ကလာပမြို့နယ် (ဋ) ရပ်ကွက်ရှိ စစ်ကောင်စီသတင်းပေး၏ နေအိမ်ကို ယမန်နေ့ည ၇ နာရီကျော်တွင် အဝေးထိန်းဗုံးဖြင့် တိုက်ခိုက်ခဲ့ခြင်း ဖြစ်သည်။
“ကျော်ကြီးဆိုတဲ့သတင်းပေးရဲ့တူမအိမ်ပါ။ လက်ရှိမှာအဲ့အိမ်က လောင်းကစားဝိုင်းကြီးလုပ်ပြီးစကစကိုထောက်တိုင်ပြုလုပ်နေတာပါ။ကျော်ကြီးက ညနေဆို လိုင်းကြေးယူပြီး စကစက ရခကိုအပ်ပါတယ်။ ဒါကြောင့် သတိပေးတိုက်ခိုက်ခဲ့တာပါ” ဟု ၎င်းက ပြောသည်။
ယင်းတိုက်ခိုက်မှုကြောင့် နေအိမ်ခြံစည်းရိုးပျက်စီးသည်ဟု ကနဦး သတင်းရရှိထားကြောင်း၎င်းကဆိုသည်။
“မြေပြင်အပျက်အဆီးအတိအကျမသိရသေးပါဘူး။ ရဲဘော်အားလုံးအန္တရာယ် ကင်းကင်းဆုတ်ခွာလာနိုင်ခဲ့ပါတယ်”ဟု တာဝန်ခံ အက္ခရာက ပြောသည်။
” ၇ နာရီကျော်လောက်က ဗုံးပေါက်သံ အကျယ်ကြီး ကြားလိုက်ရတယ်။ ဥဇ္ဇနာ (၈)လမ်းဘက်က စစ်တပ်သတင်းပေး ဒလန်အိမ်နားမှာ ဗုံးပေါက်တာလို့တော့ သိရတယ်။ လူထိခိုက်မှုတော့ မရှိဘူးလို့ သိရပါတယ် ” ဟု မြောက်ဥက္ကလာပမြို့နယ်နေ ပြည်သူတစ်ဦးကလည်းပြောသည်။
ပြည်သူ့ကာကွယ်ရေးတပ်ဖွဲ့အနေဖြင့် စစ်ကောင်စီသတင်းပေးများကို အကြိမ်ကြိမ်သတိပေးခဲ့ပြီး စစ်ကောင်စီကို ထောက်ပံ့မှုလုပ်ဆောင်နေသည့်စာရင်းရှိသလို ပေ့ခ်ျမှ တိုင်ကြားစာများလည်းလက်ခံထားရသည်ဟု ၎င်းကဆိုသည်။
“ထောက်တိုင်တွေအနေနဲ့ကိုယ့်အသက်မှကိုယ်မနှမြောရင်ဆက်လုပ်ပါ။ကျွန်တော်တို့ကရှင်းလင်းရေးကို အရှိန်အဟုတ်မြှင့်ဆက်လက်လုပ်ဆောင်တော့မှာပါ။ နောက်တစ်ကြိမ်ကသတိပေးတော့မှာမျိုးမရှိတော့ပါဘူး” ဟု ၎င်းက ပြောသည်။
