မကွေးတိုင်းဒေသကြီး၊ မင်းဘူးခရိုင်၊ စလင်းမြို့နယ်ရှိ စစ်ကောင်စီစစ်ဆေးရေးဂိတ်အားချိန်ကိုက်မိုင်းနှစ်လုံးဖြင့် ဖောက်ခွဲတိုက်ခိုက်ခဲ့ရာ ထိခိုက်သေဆုံးမှုများရှိကြောင်း ပြည်သူ့ကာကွယ်ရေးတပ်မတော်-အနောက်ပိုင်းတိုင်း(LDF)က သတင်းထုတ်ပြန်သည်။
ယနေ့(နိုဝင်ဘာလ၁ရက်)နံနက်၉နာရီ ၂၀မိနစ်ခန့်ကစလင်းမြို့နယ်၊ စလင်း-ကံပြားလမ်းဆုံရှိ စစ်ကောင်စီအုပ်စု၏ စစ်ဆေးရေးဂိတ်အားပြည်သူ့ကာကွယ်ရေတပ်မတော်-အနောက်ပိုင်းတိုင်း စလင်းတပ်ခွဲက ပြင်းအားမြင့်စီဖိုးချိန်ကိုက်မိုင်း၂လုံးဖြင့် ဖောက်ခွဲတိုက်ခိုက်ခဲ့ခြင်းဖြစ်သည်။
ထိုစစ်ဆင်ရေးအတွက် ယမန်နေ့ အောက်တိုဘာလ ၃၁ရက် ညပိုင်းတွင် ပစ္စည်းများနေရာကြိုတင်ချကာစီစဥ်ခဲ့ခြင်းဖြစ်ကြောင်း၊ ထိုပေါက်ကွဲမှုကြောင့် စစ်ကောင်စီတပ်နှင့်ရဲ စုစုပေါင်း ၉ ဦးခန့် အပြင်းအထန် ဒဏ်ရာရကာ အနည်းဆုံး ၂ဦးခန့် သေဆုံးနိုင်ပြီး ဆိုင်ကယ်နှစ်စီး ပျက်စီးခဲ့ကြောင်း ပြည်သူ့ကာကွယ်ရေးတပ်မတော်-အနောက်ပိုင်းတိုင်း(LDF)က အသိပေးသည်။
အဆိုပါဂိတ်ရှိ စစ်သားနှင့်ရဲများသည် နေ့စဥ် လမ်းသွားလမ်းလာပြည်သူလူထုအပေါ် အကြောင်းမဲ့ကြမ်းတမ်း ရိုင်းပြစွာ ဆက်ဆံခြင်း၊ တင်းကျပ်စွာစစ်ဆေးခြင်း၊ မတရားသဖြင့်ငွေညှစ်ခြင်း ၊နိုင်ငံသားများ၏ လွတ်လပ်စွာသွားလာနိုင်မှု အခြေခံလူ့အခွင့်အရေးကို ချိုးဖောက်ခြင်းတို့ကြောင့် အနောက်ပိုင်းတိုင်း (LDF)က ပစ်မှတ်ထား တိုက်ခိုက်ခဲ့ခြင်းဖြစ်ကြောင်း ပြည်သူ့ကာကွယ်ရေးတပ်မတော်-အနောက်ပိုင်းတိုင်း(LDF)က ရှင်းလင်းသည်။
“သတင်းဖြစ်စဥ် အမှန်ပါ။ ပြည်သူ့ကာကွယ်ရေးတပ်မတော်-အနောက်ပိုင်းတိုင်း LPDF တပ်ရင်းဖြစ်ပီး စလင်း -SPDFတောင်ပိုင်းတော်လှန်ရေးအင်အားစုကတပ်ခွဲပါ။ တစ်ဖွဲ့တည်းပါခင်ဗျာ။”ဟုပါဝင်တိုက်ခိုက်ခဲ့သည့်စလင်း-SPDFတောင်ပိုင်းတော်လှန်ရေးအင်အားစု အထွေထွေတာဝန်ခံ ဗိုလ်မိုးကြိုးက ပြောကြားသည်။
ပြည်သူ့ကာကွယ်ရေးတပ်မတော်-အနောက်ပိုင်းတိုင်း(LDF) အနေဖြင့် မစ်ရှင်များကိုတိုးမြှင့်လုပ်ဆောင်သွားမည်ဖြစ်ပြီး ပြည်သူလူထုအနေဖြင့်ပူးပေါင်းပါဝင်ပေးကြရန် မေတ္တာရပ်ခံသည်။
ပြည်သူ့ကာကွယ်ရေးတပ်မတော်-အနောက်ပိုင်းတိုင်း(LDF)အဖွဲ့သည် အောက်တိုဘာလ ၃၀ ရက်နေ့ကလည်း စလင်းမြို့နယ်၊ လင်းဇင်းနယ်မြေရဲစခန်းကို ချိန်ကိုက်မိုင်းဖြင့် တိုက်ခိုက်ခဲ့သေးသည်။
