ထောင်ဝင်စာပို့ခွင့်ရဖို့ အင်းစိန်ထောင်ရှေ့မှာ တန်းစီစောင့်ဆိုင်းနေရ

ရက်သတ္တပတ် ၂ ပတ်နီးပါး ထောင်ဝင်စာပါဆယ်ပို့တာကို ပိတ်ထားရာကနေ ပြန်ဖွင့်ပြီးနောက် အင်းစိန်ထောင်မှာ ဒီနေ့ ထောင်ဝင်စာ လာပို့သူတွေများပြားလို့ လမ်းမပေါ်ထိပါတန်းစီနေကြရပါတယ်။

ပုံမှန်အားဖြင့် လဆန်းရက်ပိုင်းတွေမှာထောင်ဝင်စာပါဆယ်ပို့သူတွေများလေ့ရှိပြီး ထောင်ဝင်စာပြန်ဖွင့်ပေးချိန်နဲ့ အချိန်ကိုက်ဖြစ်သွားတာမို့ဒီနေ့မှာ များပြားနေတာလို့ သိရပါတယ်။

ဒါအပြင် ထောင်ဝင်စာ ပါဆယ်တွေကို စစ်ဆေးတာ ၊ ထောင်ဝင်စာ လာပို့သူမိသားစုဝင်တွေကို စစ်ဆေးတာတွေပိုတင်းကြပ်ထားတာကြောင့် အလှည့်ကျဖို့ မိသားစုဝင်တွေဟာ တန်းစီစောင့်ဆိုင်းနေရပါတယ်။

တန်းစီးစောင့်ဆိုင်းနေရတဲ့ လူတန်းဟာ လှိုင်မြစ်လမ်းပေါ် ရှိအင်းစိန် ထောင် ပင်မဝင်ပေါက်ရှေ့ကနေ အင်းစိန်ဈေးရှေ့အထိ ရှိနေတယ်လို့ ထောင်ဝင်စာ သွားပို့သူတစ်ဦးကပြောပြပါတယ်။

ဒီလို တန်းစီနေကြသူထဲမှာ မနက်အစောပိုင်း ၆ နာရီဝန်းကျင်ထဲက လာရောက်ကြသူတွေလည်းပါတယ်လို့သိရပါတယ်။

ထောင်ဝင်စာပါဆယ်ကို ပြန်လည်ခွင့်ပြုရာမှာ အချုပ်ကျနဲ့ အကျဉ်းကျ ကို စစ်ကောင်စီက ရက်ခွဲခြားသတ်မှတ်ထားပါတယ်။

အပတ်စဉ် တနင်္လာနေ့ကနေဗုဒ္ဓဟူးနေ့အထိ အချုပ်ကျ ကို ပို့ခွင့်ရမှာဖြစ်ပြီး ကြာသပတေးနေ့ကနေ စနေ့နေအထိ အကျဉ်းကျနေသူတွေကို ပို့ခွင့်ရမှာပါ။

ဒါအပြင်ထောင်ဝင်စာ ပါဆယ်ပို့ရာမှာ မိသားစုဝင်တစ်ဦးတည်းသာခွင့်ပြုမှာဖြစ်ပြီး မိတ်ဆွေတွေ ၊ရှေ့နေတွေကတဆင့် စစ်ကောင်စီက ပို့ခွင့်မပြုပါဘူး။

ထောင်ဝင်စာပါဆယ်လက်ခံတာကို မနက် ၇ နာရီခွဲကနေ နေ့လယ်ပိုင်း ၂ နာရီအထိသာသတ်မှတ်ထားပါတယ်။