စစ်ကိုင်းတိုင်း၊ မုံရွာ – ချောင်းဦးလမ်းပိုင်းတွင် Jummer ကားသုံးစီးဖြင့် မိုင်းရှာနေသော စစ်ကောင်စီတပ်အား ပဒေသာမိုင်းဖြင့် မိုင်းဆွဲတိုက်ခိုက်ရာ စစ်အုပ်စုအထိအခိုက်များကြောင်း AREA 71 Defense Force Monywa အဖွဲ့ခေါင်းဆောင် ကိုထွန်းက ပြောသည်။
ယနေ့ (နိုဝင်ဘာလ ၂ ရက်) နံနက် ၁၁ နာရီ ၃၉ မိနစ်ခန့်က မုံရွာမြို့မှ ထွက်ခွာလာသော စစ်ကောင်စီ၏ Jummer ကား သုံးစီးသည် မုံရွာ-ချောင်းဦးလမ်းပိုင်း တောင်ပုံကျေးရွာနှင့် ပုရစ်ကုန်းမြောက်ရွာကြား၌ ကား၏ဘေးဝဲယာတွင် မိုင်းရှာနေစဥ် မိုင်းဆွဲတိုက်ခိုက်ခဲ့ကြောင်း AREA 71 Defense Force Monywa အဖွဲ့ခေါင်းဆောင် ကိုထွန်းက ပြောသည်။
“မျက်မြင်ပြည်သူများ၏ ပြောပြချက်အရ စခ ၆ ကောင်မှာ လမ်းဘေးသို့လွင့်စင်သွားပြီး ခဏအကြာတွင် လူနာတင်ကားတစ်စီး ရောက်ရှိလာပြီး ဒဏ်ရာရသူစခများနှင့် ထိခိုက်သေဆုံးသည်ဟုထင်ရသည့် စခများအား တင်ဆောင်သွားကြောင်း သိရပါတယ်။”ဟု AREA 71 Defense Force Monywa အဖွဲ့ခေါင်းဆောင် ကိုထွန်းက ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
မိုင်းထိပြီးနောက် စစ်ကောင်စီတပ်က ရမ်းသမ်းပစ်ခတ်မှုများပြုလုပ်ခဲ့ကြောင်း၊ ထိခိုက်သေဆုံးသွားသည့် အလောင်းများအား ကားပေါ်တင် ဆောင်သွားပြီး အရေအတွက်များသည်ဟု ၎င်းက ဆိုသည်။
အဆိုပါ စစ်ဆင်ရေးအား AREA 71 Defense Force Monywa၊ Farmers Revolution Force-CHU၊ Monywa Special ဒိတ်ဒိတ်ကြဲ၊ မဟာမိတ် သုံးဖွဲ့ပူးပေါင်း၍ တိုက်ခိုက်ခဲ့ခြင်းဖြစ်ပြီး ရဲဘော်များအထိအခိုက်မရှိဆုတ်ခွာနိုင်ကြောင်း အသိပေးထားသည်။
Jummer ကားသုံးစီးနှင့် စစ်ကောင်စီတပ်များအား အခြားအဖွဲ့များကလည်း မိုင်းဆွဲတိုက်ခိုက်ခဲ့ကြသေးသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)