ကချင်လွတ်လပ်ရေးအဖွဲ့/ကချင်လွတ်လပ်ရေးတပ်မတော်(KIO/KIA) ထိန်းချုပ်နယ်မြေ မိုင်ဂျာယာန် မြို့သို့ စစ်ကောင်စီတပ်က ယနေ့ လက်နက်ကြီးဖြင့် ပစ်ခတ်တိုက်ခိုက်ခဲ့ကြောင်း ကချင်ဒေသခံတစ်ဦးက ပြောသည်။
နိုဝင်ဘာ ၆ရက် နေ့လယ်ပိုင်းက တိုက်ပွဲဖြစ်ပွားမှုမရှိဘဲ အကြောင်းမဲ့ ပစ်ခတ်တိုက်ခိုက်ခဲ့ခြင်းဖြစ်သည်ဟု ဆိုသည်။
![(ပညာရေးမြို့တော်ဖြစ်သော မိုင်ဂျာယာန်မြို့ မြင်ကွင်းများ)](https://i0.wp.com/www.ludunwayoo.com/wp-content/uploads/2022/11/314567853_506912798164844_2884036267710577210_n.jpg?resize=720%2C405&ssl=1)
“ဘယ်လိုကြောင့် ပစ်တာလဲတော့ မပြောတက် ဘူး။ အဲဒီ မိုင်ဂျာယန်ဘက်မှာ လက်နက်ကြီးသုံးကြိမ် ပစ်တယ်ဆိုတာ ကြားသိရတယ်။ ထိခိုက်ဒဏ်ရာရတယ် ဘာညာတော့ ဘာမှ မကြားရဘူး”ဟု ကချင်ဒေသခံက ပြောသည်။
အဆိုပါ ပစ်ခတ်မှုကို မိုင်ဂျာယာန်နှင့်ဆက်စပ်နေသည့် လွယ်ဂျယ်အခြေစိုက် စစ်ကောင်စီတပ်က ပစ်ခတ်ခြင်းဖြစ်နိုင်ကြောင်း ၎င်းက ဆိုသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
ယမန်နေ့ နိုဝင်ဘာ ၅ရက်ညပိုင်းက ဗန်းမော်မြို့ရှိ စစ်ကောင်စီလေတပ်နှင့် မြစ်ကြီးနားရှိ သံချပ်ကာတပ်တို့ကို KIAက လက်နက်ကြီးဖြင့် ပစ်ခတ်တိုက်ခိုက်မှု ဖြစ်ပေါ်ခဲ့ပြီးနောက် စစ်ကောင်စီတပ်က KIA ထိန်းချုပ်နယ်မြေရှိ မိုင်ဂျာယာန်မြို့ကို ပစ်မှတ် ထား တိုက်ခိုက်လာခြင်းဖြစ်သည်။
မိုင်ဂျာယာန်မြို့သည် ယခင်က လောင်းကစားမြို့တော်ဖြစ်သော်လည်း လောင်းကစားလုပ်ငန်းများ ရပ်ဆိုင်းသွားသည်မှာ နှစ်ပေါင်းများစွာကြာမြင့် ပြီဖြစ်သည်။
![(ပညာရေးမြို့တော်ဖြစ်သော မိုင်ဂျာယာန်မြို့ မြင်ကွင်းများ)](https://i0.wp.com/www.ludunwayoo.com/wp-content/uploads/2022/11/312871972_506912744831516_2463443395990915694_n.jpg?resize=720%2C480&ssl=1)
“အရင်တုန်းက ကစားဝိုင်းဘာညာရှိတယ်။ အခုက ကစားဝိုင်းမရှိတော့ဘူး။ ကစားဝိုင်းလုပ်တဲ့နေရာအားလုံးက ကျောင်းလုပ်လိုက်ပြီ။ ပညာရေးမြို့တော်လုပ်လိုက်ပြီဆိုတော့ ကျောင်းသားကျောင်းသူပဲရှိတယ် အဲဒီမှာ”ဟု ကချင်ဒေသခံက ပြောသည်။
မြန်မာ- တရုတ်နယ်စပ်မြို့ မိုင်ဂျာယာန်တွင် မိုင် ဂျာယာန်ကောလိပ်နှင့် ဖက်ဒရယ်ဥပဒေ အကယ်ဒမီ၊ Institute of Education Mai Ja Yang ၊ Institute of Liberal Arts and Sciences အပါအဝင် ပညာရေးနှင့်ပတ်သက်သည့် ကျောင်းများဖွင့်လှစ်ထားသည် မိုင်ဂျာယာန်မြို့ကို ပညာရေးမြို့တော်ဖြစ်လာစေရေး ကြိုးစားသွားရန် KIO ဗဟိုကော်မတီဝင် ဗိုလ်ချုပ်ဂွန်မော်က ပြောကြားထားသည်။
![(ပညာရေးမြို့တော်ဖြစ်သော မိုင်ဂျာယာန်မြို့ မြင်ကွင်းများ)](https://i0.wp.com/www.ludunwayoo.com/wp-content/uploads/2022/11/313924267_506912811498176_6171928699060644038_n.jpg?resize=720%2C480&ssl=1)
KIAနှင့် စစ်ကောင်စီတပ်တို့သည် လတ်တလောတွင် ကချင်ပြည်နယ် မိုးမောက်မြို့နယ်နှင့် ဖားကန့်မြို့နယ်တို့၌ တိုက်ပွဲများ လက်နက်ကြီးဖြင့် အပြန်အလှန် ပစ်ခတ်မှုများ၊ ထိတွေ့တိုက်ပွဲများ မကြာခဏ ဖြစ်ပေါ်လျက်ရှိသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)