မန္တလေးမြို့ ၊ ပြည်ကြီးတံခွန်မြို့နယ် ၊ငွေတော်ကြည်ကုန်းရပ်ကွက်မှာရှိတဲ့ ဆောက်လုပ်ရေးကုမ္ပဏီ နေအိမ်ရုံးခန်းဟာ မနေ့က နေ့လယ်ပိုင်းမှာ ဓားပြတိုက်ခံလိုက်ရပါတယ်။
ငွေတော်ကြည်ကုန်းရပ်ကွက်၊ ၇၅ လမ်း ၊ ၁၁၇ လမ်းနဲ့ ၁၁၈ လမ်းကြားမှာရှိတဲ့ ရှင်းမြတ်မြန်မာဆောက်လုပ်ရေးကုမ္ပဏီ နေအိမ်ရုံးခန်းကို နေ့လယ် ၁ နာရီခွဲခန့်မှာ အမျိုးသား ၂ ဦး ဆိုင်ကယ်နဲ့ရောက်လာပြီး သေနတ်ပြကာ ဓားပြတိုက်သွားတာလို့ သိရပါတယ်။
ဒီလို ဓားပြတိုက်သွားတဲ့ CCTV ရုပ်သံဖိုင်လည်း လူမှုကွန်ရက်မှာ တက်လာပါတယ်။
ဓားပြတိုက်မယ့် အမျိုးသား ၂ဦးဟာ ဆောက်လုပ်ရေးသုံး ပစ္စည်းဖိုး ငွေချေမယ်ဆိုကာ နေအိမ် ရုံးဝင်းထဲ ဝင်လာပြီး ဓားပြတိုက်သွားတာလို့ စစ်အုပ်စုဘက်ကတော့ သတင်းထုတ်လာပါတယ်။
ဓားပြတိုက်မှုမှာ ငွေကျပ်သိန်း ၃၂၀ နဲ့ ဖုန်း ၂ လုံးပါသွားတယ်လို့သိရပါတယ်။
ဓားပြတိုက်ခံရတဲ့အချိန်မှာ ရုံးခန်းထဲ ဝန်ထမ်း ၅ ဦးရှိနေပေမယ့် သေနတ်ပြပြီး ဓားပြတိုက်သွားတယ်လို့ စုံစမ်းသိရပါတယ်။
အခုလို ဓားပြတိုက်မှု ဖြစ်ခဲ့တဲ့ ငွေတော်ကြည်ကုန်းရပ်ကွက်မှာ ပြီးခဲ့တဲ့လပိုင်းကလည်း အမျိုးသမီး ၂ ဦးသတ်ဖြတ်ခံရတဲ့ လုယက်မှုဖြစ်ခဲ့ပါသေးတယ်။
