ထီးလင်းမြို့နယ်အတွင်းရှိ စစ်ဘေးရှောင် ပြည်သူ များကို ဒုတိယအကြိမ်မြောက် ကျန်းမာရေးစောင့်ရှောက်မှု ပေးခဲ့ကြောင်း ထီးလင်း ပြည်သူ့ကာကွယ်ရေးတပ်(PDF) က ယနေ့(နိုဝင်ဘာ ၇ရက်) တွင် သတင်းထုတ်ပြန်သည်။
စစ်ကောင်စီတပ် နှင့် ပျူစောထီးအင်အား ၁၀၀ ကျော်က ထီးလင်းမြို့နယ်အတွင်း စစ်ကြောင်း ထိုးနေသည်မှာ တစ်လကျော်ရှိပြီဖြစ်ပြီးမြို့နယ်အတွင်း၌ စစ်ရှောင်အများအပြားရှိလာသည်ဟုဆိုသည်။
စစ်ဘေးရှောင်များထဲတွင် သက်ကြီးရွယ်အိုများ၊ လေဖြတ်ထားသောလူနာများ၊ ကလေးသူငယ် များ၊မွေးကင်းစကလေးလေးများမှာ ရာသီအကူးအပြောင်းကြောင့် ဖျားနာသူများပြားနေပြီး ကျန်းမာရေးစောင့်ရှောက်မှုလိုအပ်နေကြောင်း သက်ဆိုင်ရာ ပြည်သူ့အုပ်ချုပ်ရေးအဖွဲ့များထံ အကြောင်းကြားလာ၍ ထီးလင်း PDF ဆေးအဖွဲ့က ကျန်းမာရေး စောင့်ရှောက်မှု အခမဲ့ပြုလုပ်ပေးခဲ့သည်ဟု ထုတ်ပြန်သည်။
ထိုသို့ ကုသမှုပေးရာ၌ စစ်ဘေးရှောင် လူနာဦးရေ ၅၀၄ ဦးကို ကျန်းမာရေး စောင့်ရှောက်မှု ပေးနိုင်ခဲ့သည်ဟု ဖော်ပြထားသည်။
ပြီးခဲ့သည့် စက်တင်ဘာလကလည်း ထီးလင်း PDF ဆေးအဖွဲ့အနေဖြင့် ကျန်းမာရေးစောင့်ရှောက်မှု ရရန်အားနည်းပြီး ဆေးဝါးပစ္စည်းမှာယူရန်ခက်ခဲသော ကျေးရွာများကို ကျန်းမာရေးစောင့်ရှောက် ပေးခဲ့သည်ဟု ထုတ်ပြန်ထားသည်။
ထိုသို့ ကူညီပေးနေသော်လည်း ငွေအင်အား ဆေးအင်အား နည်းပါးသောကြောင့် ကျန်းမာရေး စောင့်ရှောက်မှု လုပ်ငန်းများ လည်ပတ်နိုင်ရန် ဆေးဝါးအလှူ၊ ဆေးဝယ်ယူရန် အလှူငွေများ ထည့်ဝင်နိုင်ကြောင်း ထီးလင်း PDFက အသိပေးထားသည်။
ထီးလင်း PDF ဆေးအဖွဲ့က စစ်ရှောင်များအား ဒုတိယအကြိမ် ကျန်းမာရေးစောင့်ရှောက်မှုပေးနေစဉ်၊ ဓာတ်ပုံ – ထီးလင်း PDF
