ဒီးမော့ဆိုမြို့နယ်ရှိ စစ်ကောင်စီတပ်ကို စနိုက်ပါဖြင့် ပစ်ခတ်တိုက်ခိုက်ရာ စစ်ကောင်စီတပ်သားတစ်ဦးသေဆုံးကြောင်း ကရင်နီအမျိုးသားများကာကွယ်ရေးတပ်(KNDF)တပ်ရင်း -၅က ယနေ့ ထုတ်ပြန်သည်။
တိုက်ခိုက်မှု ဖြစ်စဥ်မှာ ယမန်နေ့ (နို၀င်ဘာ ၉ ရက်)နေ့လယ် ၁၂ နာရီ ၄မိနစ်ခန့်တွင် သေးဆူးလဲရွာတွင် တပ်စွဲထားသော စစ်ကောင်စီတပ် ဖွဲ့၀င်များအား စနိုက်ပါဖြင့်ပစ်ခတ်ခဲ့ခြင်းဟု ဆိုသည်။
စစ်ကောင်စီတပ်သား တစ်ဦးသေဆုံးကြောင်းအတည်ပြုနိုင်ပြီး KNDF ရဲဘော်များ အထိအခိုက်မရှိပြန်လည် ဆုတ်ခွာနိုင်ခဲ့ကြောင်း အသိ ပေး သည်။
![KNDFမှ စနိုက်ပါရဲဘော်နှင့် စစ်ကောင်စီလက်နက်ကြီးကြောင့် ပျက်စီးမှုများအား တွေ့ရစဉ်၊ဓာတ်ပုံ - KNDF](https://i0.wp.com/www.ludunwayoo.com/wp-content/uploads/2022/11/314577901_509540127902111_5455338079830859541_n.jpg?resize=880%2C660&ssl=1)
“အဲဒီတိုက်ခိုက်မှုအပြင် မနေ့က ညနေပိုင်း ဒီး မော့ဆိုမှာ တိုက်ပွဲဖြစ်သွားတယ်လို့ မြေပြင် သတင်းအရ သိရတယ်။တစ်ခုရှိတာ သူတို့ဘက် က အထိနာရင် လေကြောင်း ဒါမှမဟုတ် လက်နက်ကြီးပစ်ကူ အရမ်းပေးတယ်။မနေ့ညက ဆို ဖယ်ခုံအနောက်ဖက်ခြမ်း၊ဒီးမော့ဆိုအရှေ့၊အနောက် ပတ်ပတ်လည် လက်နက်ကြီး နဲ့ အဆက်မပြတ်ကို စကစက ရမ်းသမ်းထုခဲ့တယ်”ဟု ဒီးမော့ဆိုမြို့နယ် ပြည်သူ့ကာကွယ် ရေးတပ်ဖွဲ့ဝင် တစ်ဦးက လူထုနွေဦးသို့ ပြောသည်။
ယမန်နေ့ညပိုင်းက စစ်ကောင်စီပစ်ခတ်သည့် လက်နက်ကြီးသည် ဖယ်ခုံမြို့နယ် လအိကျေး ရွာသို့ ကျရောက်ခဲ့ပြီး ဒေသခံပြည်သူသုံးဦး ထိခိုက် ဒဏ်ရာရရှိပြီး နေအိမ်အချို့ပျက်စီးခဲ့သည်။
![KNDFမှ စနိုက်ပါရဲဘော်နှင့် စစ်ကောင်စီလက်နက်ကြီးကြောင့် ပျက်စီးမှုများအား တွေ့ရစဉ်၊ဓာတ်ပုံ - KNDF](https://i0.wp.com/www.ludunwayoo.com/wp-content/uploads/2022/11/314207304_509540147902109_5568499000706717761_n.jpg?resize=880%2C660&ssl=1)
“လက်နက်ကြီး ကျည်ထိတဲ့ အမျိုးသားတစ်ဦး ကတော့ စိုးရိမ်ရတယ်။နောက်ထိတဲ့သူ အမျိုး သမီးနှစ်ဦးက အသက် ၈၁ နှစ် နဲ့ ၄၄နှစ် အရွယ်ဖြစ်တယ်”ဟု ဖယ်ခုံမြို့နယ် ပြည်သူ့အုပ်ချုပ် ရေးအဖွဲ့က ပြောသည်။
ဖယ်ခုံမြို့အခြေစိုက် ခမရ(၃၃၆)ကလက်နက်ကြီး ဖြင့် ရမ်းသမ်းပစ်ခတ်မှုများရှိနေ၍ ပြည်သူများအနေဖြင့် လုံခြုံစိတ်ချရသည့် နေရာများတွင် နေထိုင်ရန် မိုးဗြဲ PDF တပ်ရင်း -၂ က ယမန်နေ့ည ၈နာရီခန့်တွင် အရေးပေါ် သတိပေးချက်ထုတ် ပြန်ထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)