စစ်တပ်အာဏာသိမ်းပြီးနောက် မန္တလေးမှာ ကျုးကျော်ဆိုပြီး ဖယ်ရှားရှင်းလင်းတာတွေလုပ်ဆောင်နေရာမှာ မနေ့ကလည်း အောင်မြေသာစံမြို့နယ် သံလမ်းဘေးက နေအိမ်တွေကို ဖျက်ခိုင်းခဲ့ပါတယ်။
အိုးဘိုရပ် ၊သံလမ်းအနီး ၁၂ လမ်းကစတင်ပြီး သံလမ်းဘေး ဘက်မှာရှိတဲ့နေအိမ်တွေကို ဖျက်ခိုင်းတာလို့သိရပါတယ်။
“ကျမတို့ကို ဂရမ်မြေပုံထဲမပါဘူးဆိုပြီး အိမ်အကုန်ဖျက်သွားတာ”လို့အောင်မြေသာစံမြို့နယ်၊ အိုးဘိုရပ်မှာနေထိုင်သူတစ်ဦးကပြောပါတယ်။
နေအိမ်တွေကိုဖယ်ရှားရာမှာ စစ်ကောင်စီတပ်သားတွေ က လက်နက်ကိုင်ပြီး လုံခြုံရေးယူပေးခဲ့တယ်လို့သိရပါတယ်။
အခုလို မန္တလေးမှာ နေအိမ်တွေဖယ်ရှားခံရတာကို အာဏာသိမ်းပြီးနောက် မကြာခဏ ကြုံနေရတာပါ။
ဖယ်ရှားခံရတဲ့နေရာအချို့မှာတော့ မူလပိုင်ရှင်ဆိုကာ ဝင်ရောက်ခြံခတ်တာတွေလည်းရှိနေတယ်လို့ ဒေသခံတွေက ပြောပြကြပါတယ်။
အာဏာသိမ်း စစ်အုပ်စုနဲ့ နီးစပ်တဲ့ လုပ်ငန်းရှင်တွေဟာ ပိုက်ဆံပေးပြီး ဖျက်ခိုင်းတာလို့ ဒေသခံတွေ ယူဆနေကြတာတွေရှိနေပါတယ်။
ပြီးခဲ့တဲ့ လပိုင်းကတင် ချမ်းမြသာစည်မြို့နယ်အတွင်း သံလမ်းဘေးက နေအိမ်တွေကို ဖယ်ရှားပြီးနောက် အဲဒီနေရာမှာ မြေပိုင်ရှင်ဆိုသူက အရက်ဆိုင်ဖွင့်လိုက်တာတွေ့ရတယ်လို့ ဒေသခံတစ်ဦးက ပြောပါတယ်။
