မြောင်မြို့နယ်နနွင်းကိုင်းကျေးရွာတစ်ရွာလုံးနီးပါးကို မီးရှို့ဖျက်ဆီးခဲ့သည့် စစ်ကောင်စီတပ်သည် ပြန်ထွက်မသွားသေးဘဲ ရွာတွင် အထိုင်ချတပ်စွဲထားကြောင်း ဒေသခံများကပြောသည်။
“ပထမက အင်အား တစ်ရာလောက်နဲ့ လာတာ။ အခုက အင်အားထပ်တိုးလာတယ်။ ၁၅၀လောက်ဖြစ်နေပြီ။ ရွာမှာ တပ်စွဲထားလိုက်ကြပြီ။ လုံးဝ ဝင်မရတော့ဘူး”ဟုနနွင်းကိုင်းရွာဒေသခံတစ်ဦးကပြောသည်။
မန္တလေးမှထွက်ခွာလာပြီးဆန်အိတ်၁၅၀၀၀ကျော်တင်ဆောင်လာသောစစ်ကောင်စီတပ်သင်္ဘာကို မြောင်မြို့နယ် ပြည်သူ့ကာကွယ်ရေးနှင့်လုံခြုံရေးတပ်ဖွဲ့ (CDSOM)ကနိုဝင်ဘာ ၆ရက်နေ့ခင်းပိုင်းတွင် နနွင်းကိုင်းဆိပ်ကမ်းကပ်ခိုင်းပြီးဖမ်းဆီး၍စစ်ဘေးရှောင်ပြည်သူများကို ဆန်အိတ်များယူဆောင်စေခဲ့သည်။စစ်ကောင်စီတပ်က ဆန်နှင့်ရိက္ခာတင်သင်္ဘာ ဖမ်းဆီးခံရပြီးနောက် နိုဝင်ဘာ ၇ ရက်တွင်နနွင်းကိုင်းရွာသို့စစ်ကြောင်းထိုးလာပြီး နေအိမ်များကိုမီးရှို့ဖျက်ဆီးကာ အကြမ်းဖက်၍ ရွာတွင်တပ်စွဲထားခြင်းဖြစ်သည်။
အိမ်ခြေလေးရာရှိသည့်အနက် အများစု မီးလောင်သွားပြီး ရွာကို ဝင်၍မရသေးသောကြောင့် အိမ်ခြေအတိအကျမသိရသေးဟု ပြည်သူ့ကာကွယ်ရေးရဲဘော်တစ်ဦးကပြောသည်။
” မနေ့က ရွာထဲကနေ ပြည်သူပိုင်ပစ္စည်းတွေကို ကားနှစ်စီးနဲ့ တိုက်သယ်သွားတယ်။ အခုက ဆယ်ရွာထက်မနည်းကို မီးရှို့မယ်လို့သတင်းတွေထွက်နေတယ်”ဟုပြည်သူ့ကာကွယ်ရေးရဲဘော်တစ်ဦးကပြောသည်။
စစ်ကောင်စီတပ်သည်နနွင်းကိုင်းရွာနှင့် ကပ်လျက်ရှိသော ရွှေတချောင်းရွာ၊ ဆူလေကုန်းရွာတို့ကိုလည်း မီးရှို့ဖျက်ဆီးခဲ့သည်။ မြောင်မြို့နယ်တစ်နယ်လုံးတွင် စစ်ဘေးရှောင်နေရသူ နှစ်သောင်းနီးပါးရှိနေပြီဟု CDSOMက သတင်းထုတ်ပြန်ထားသည်။
