နှစ်ကုန်ပိုင်းတွင် ထိုးစစ်အရှိန်ပိုမြှင့်လာနိုင်ဟုဆို
စစ်ကောင်စီလက်အောက်ခံ တပ်မအားလုံးရှေ့တန်းစစ်မျက်နှာပြင်တွင် ဖြန့်ကျက်ထားပြီးယခုနှစ်ကုန်ပိုင်းတွင် ထိုးစစ်အရှိန်ပိုမြှင့်လာနိုင် ကြောင်း တပ်တွင်းစစ်ရေးသတင်းရင်းမြစ်များက လူထုနွေဦးသို့ ပြောသည်။
လက်ရှိတွင် စစ်ဆင်ရေးကွပ်ကဲမှုဌာနချုပ်၏ လက်ရုံးတပ်ဖွဲ့များဖြင့်သာ နောက်တန်းလုံခြုံရေးယူထားရသည်ဟု ၎င်းတို့က ဆိုသည်။
“မုံးကိုး ဘက်မှာဆိုသုံးနှစ် နီးပါးရှိတဲ့အထိ တပ်မ (၉၉)ရဲ့ တပ်ရင်းတွေအားလုံး နီးပါးအထိုင်ချထားတယ်။နောက်ပြီး တပ်မ(၇၇)ရဲ့ အင်းတိုင်ကတပ်တွေကိုပါ မုံးကိုးကိုထိုးစစ်ဆင်ဖို့ လုပ်ပေမယ့်မရလို့ အရင်သုံးလေးလောက်က တပ်မ (၇၇)တပ်တွေ ပြန်ဆင်းလာတယ်။အခု ရှမ်းဘက်ကို ဒီလကုန် သွားရမှာ”ဟု တပ်တွင်း သတင်းရင်းမြစ်က ရှင်းပြသည်။
အလားတူ ကရင်နီ(ကယား)ပြည်နယ်တွင်လည်း ယခုလ (သို့မဟုတ်) ဒီဇင်ဘာလဆန်းပိုင်းကစ၍ စစ်ကောင်စီ၏ ကြီးမားသည့် ထိုးစစ်ဆင်မှုများရှိလာလိမ့်မည်ဟုလည်း သီးခြားသတင်းရင်းမြစ်က ပြောသည်။
“အခု ကရင်နီထဲကို ထိုးစစ်ဆင်နေတဲ့ တပ်မ(၆၆)ကို ကူဖို့ တပ်မ(၅၅)ပါလာဖို့ရှိတယ်။ ၅၅က အရင် ၂၀၁၆ လောက်က ကရင်နီထဲမှာ စစ်ရေးဝင် ဖူးခဲ့တာမျိုးလည်းရှိထားဖူးတယ်”ဟု ၎င်းက အတည်ပြုသည်။
ယခုကဲ့သို့ စစ်ရေးအရှိန်မြှင့်ရသည့် အကြောင်း ပြချက်သည် ၂၀၂၃တွင် ရွေးကောက်ပွဲ အောင် မြင်စွာကျင်းပနိုင်ရေးကို စစ်ကောင်စီက ရည်မှန်းနေခြင်းဟု ၎င်းတို့က ဆိုသည်။
“ရန်ကုန်၊မန္တလေး အပါအဝင် ပြည်နယ်နဲ့တိုင်းက မြို့ကြီးတွေကို အလုံးစုံထိန်းချုပ်နိုင်ဖို့က အရေး ကြီးနေတာကို။ဒါကို မဖြစ်မနေ လုပ်လိမ့်မယ်။ဒါကြောင့်လည်း ပြီးခဲ့တဲ့ နှစ်လလောက်ကစပြီး စစ်တိုင်းမှူးတွေ နေရာအပြောင်းအလဲ လုပ်ခဲ့တာလည်းပါတယ်”ဟု တပ်တွင်းသတင်းရင်းမြစ်က ပြောသည်။
“စခ တွေဘက်ကတော့ သူတို့လုပ်စရာရှိတာ လုပ်နေမှာပဲ။တစ်ခုရှိတာ ပြည်သူတွေကို အခြေ ပြုပြီး ရပ်တည်နေရတဲ့ ကျွန်တော်တို့ ပြည်သူ့ ကာကွယ်ရေးတပ်ဖွဲ့တွေရဲ့ ရေရှည်ရင်ဆိုင်နိုင်စွမ်းကလည်း အာဏာရှင်တော်လှန်စိတ်ရှိတဲ့ ပြည်သူတွေအား အရမ်းလိုအပ်ပါတယ်။ပြောရမယ်ဆို စစ်တပ်ရဲ့ မတရားအာဏာသိမ်းခါစ ကာ လ က စိတ်ဓာတ်တွေ ပြန်လိုပါတယ်။ဒီနှစ်ကုန် တိုက်ပွဲတွေက အဆုံး အဖြတ် ဖြစ်လာနိုင်တယ်”ဟု အရှိန်မြင့်လာသည့် စစ်ကောင်စီ၏ ထိုးစစ်အပေါ် မိုးဗြဲမြို့နယ်ပြည်သူ့ကာကွယ်ရေးတပ်ဖွဲ့ တာဝန်ရှိသူက သုံးသပ်သည်။
မြေပြင်တိုက်ပွဲအချက်အလက်များအရ တပ်မ (၈၈)မှာ ကချင်ပြည်နယ်၊ တပ်မ (၂၂)ရခိုင်ပြည် နယ်၊တပ်မ (၄၄)မှာ ကရင်ပြည်နယ်၊ တပ်မ (၁၁)၊ (၇၇)နှင့် (၁၀၁)တို့သည် စစ်ကိုင်း၊မကွေးတိုင်းနှင့် ချင်းပြည်နယ်တို့တွင် အဓိကထားထိုးစစ်ဆင်နေပြီး အချို့ပြည်နယ်များတွင် တပ်မများပူးတွဲစစ်ဆင်ရေးလုပ်လျက်ရှိသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)