ကရင်နီပြည်နယ် ဒီးမော့ဆိုမြို့နယ်၊ ဒေါငံခါးကျေးရွာတွင် တိုက်ပွဲဖြစ်ပွားပြီ စစ်ကောင်စီတပ်သားနှစ်ဦးသေဆုံးကြောင်း အလယ်ပိုင်းတိုင်းဒီးမော့ဆို အမှတ် (၁၁၀၂)တပ်ရင်းက ထုတ်ပြန်သည်။
ဒေါငံခါးရွာတွင် တပ်စွဲထားသည့် စစ်ကောင်စီတပ်ကို ယမန်နေ့(နိုဝင်ဘာ ၁၃ရက်) နံနက် ၁၁နာရီခန့်ကစ၍ ၁နာရီကျော်ကြာ သွားရောက်တိုက်ခိုက်ခဲ့သည်ဟု ဆိုသည်။
“မျက်မြင် နှစ်ကောင်သေတယ်ဆိုတာ အတည်ပြုနိုင်တယ်။တိုက်ပွဲက ၁နာရီကျော်အထိ ပြင်းထန်ခဲ့ပြီး စခဘက်က လက်နက်ကြီးပစ်ကူ အဆမတန်ပေးနေလို့ ပြန်ဆုတ်ခဲ့တယ်”ဟု အမှတ် (၁၁၀၂)တပ်ရင်း တာဝန်ရှိသူက ပြောသည်။
ဒေါငံခါးကျေးရွာအတွင်းရှိ ပြည်သူလူထုနေအိမ် များ အပါအဝင် စစ်ကောင်စီက အင်အား ၄၀ခန့်ဖြင့် တပ်စွဲထားကြောင်း အသိပေးသည်။
ဒီးမော့ဆိုမြို့နယ် အနောက်ဘက်ခြမ်းရှိ ဒေါငံခါးကျေးရွာသည် KNDFနှင့် နယ်မြေခံ PDF တပ်ဖွဲ့များ ထိန်းချုပ်နိုင်ခဲ့သည့် နယ်မြေဖြစ်ခဲ့ဖူးသည်။
သို့သော် စစ်ကောင်စီက လေကြောင်း၊ လက်နက်ကြီးပစ်ကူများနှင့်အတူ သာလွန်အင်အား ထိုးစစ်များအသုံးပြု၍ ၂၀၂၂ မတ်လတွင် ဒေါငံခါးကျေးရွာကို ထိန်းချုပ်ခဲ့သည်။
ထို့ကြောင့် စစ်ကောင်စီတပ်စွဲနေသည့် ဒေါငံခါးကျေးရွာကို အခြေပြု၍ ယခုနှစ်လယ်ပိုင်းကစ၍ ကရင်နီပူးပေါင်းတပ်ဖွဲ့များက မကြာခဏ တိုက်ခိုက် လျက်ရှိသည်။
