အာဏာသိမ်းသည့်နေ့တွင် အကြမ်းဖက်စစ်ကောင်စီက မတရားဖမ်းဆီးခဲ့သည့် ဒါရိုက်တာ မင်းထင်ကိုကိုကြီး နှင့်ရက်ဂေးအဆိုတော် စောဖိုးခွားတို့ ပြန်လည်လွတ်မြောက်လာကြောင်း ၎င်းတို့နှင့်နီးစပ်သူများက အတည်ပြုသည်။
“မယ်တို့ပျော်နေတာအရမ်း ၊ မယ့်အပါးအိမ်ပြန်ရောက်ပါပြီတဲ့ “ဟု ဒါရိုက်တာမင်းထင်ကိုကိုကြီး ပြန်လည်လွတ်မြောက်လာကြောင်း ၎င်း၏ ဇနီးဟောင်းက လူမှုကွန်ရက်မှတစ်ဆင့် အသိပေးထားသည်။
အကြမ်းဖက်စစ်ကောင်စီက ဒါရိုက်တာမင်းထင်ကိုကိုကြီးကို ပုဒ်မ – ၅၀၅(ခ) ဖြင့်တရားစွဲဆိုကာ ထောင်ဒဏ် နှစ်နှစ်ချမှတ်ခဲ့သလို ရက်ဂေးအဆိုတော် စောဖိုးခွားကို သဘာဝဘေးစီမံခန့်ခွဲမှု ပုဒ်မ ၃၀ (က)၊ ပုဒ်မ ၅၀၅ (ခ)တို့ဖြင့် တရားစွဲဆိုကာ ထောင်ဒဏ်နှစ်နှစ် မတရားချမှတ်ခဲ့ခြင်းဖြစ်သည်။
အဆိုပါ အနုပညာရှင်နှစ်ဦး မတရားဖမ်းဆီးခံထားရသည်မှာ တစ်နှစ်နှင့် ကိုးလကြာမြင့်ပြီဖြစ်သောကြောင့် လွတ်ရက်စေ့၍ လွှတ်ပေးခြင်းဖြစ်နိုင်ကြောင်း ပြည်သူအချို့က ခန့်မှန်းထားသည်။
အကြမ်းဖက်စစ်ကောင်စီသည် အောက်တိုဘာ ၂၈ရက်ကလည်း အဆိုတော် ပိုပို ၊ အလှအပဆိုင်ရာ ဘလော့ဂါ ဝင်းမင်းသန်း နှင့် ဒါရိုက်တာ မိုက်တီးတို့ကို ပြန်လွှတ်ပေးခဲ့သည်။
စစ်ကောင်စီက ၎င်းတို့ မတရားပုဒ်မတပ်ဖမ်းဆီးထားသည့် အနုပညာရှင်များကို ယခုနှစ်အတွင်း ဆက်တိုက်လွှတ်ပေးနေသော်လည်း လက်ရှိအချိန်တွင် ရဲတိုက်၊ ဆင်မ စသည့် အနုပညာရှင်များကျန်ရှိနေသည်။
