ရခိုင်ပြည်နယ် ပုဏ္ဏားကျွန်းမြို့နယ် ဆောင်းတုံရွာ၌ စစ်ကောင်စီတပ် ပစ်ခတ်သည့် လက်နက်ကြီးကျ၍ အရပ်သား သုံးဦးသေဆုံးပြီး သုံးဦးဒဏ်ရာရရှိခဲ့ကြောင်း ရခိုင်ဒေသခံက ပြောသည်။
ယနေ့ (နိုဝင်ဘာ ၁၆ရက်)တွင် စစ်ကောင်စီတပ်က တိုက်ပွဲဖြစ်ပွားမှုမရှိဘဲ လက်နက်ကြီးဖြင့် ပစ်ခတ်ခဲ့ခြင်းဖြစ်သည်ဟု ဆိုသည်။
“အဲဒီမှာ လက်နက်ကြီး ရွာထဲကျလို့ သုံးယောက်သေတယ် သုံးယောက်ဒဏ်ရာရတယ်လို့ ကြားတယ်။ အဲဒီနေရာက နည်းနည်းအလှမ်းဝေးတယ်။ တောဖက်ကျတယ်။ အဲဒီမှာ မြို တိုင်းရင်းသားတွေများတယ် အဲဒီမှာနေတာ”ဟု ရခိုင်ဒေသခံက ပြောကြားသည်။
![ထွက်ပြေးတိမ်းရှောင်နေကြရသော ပုဏ္ဏကျွန်းပြည်သူများ၊ ဓာတ်ပုံ - BNA](https://i0.wp.com/www.ludunwayoo.com/wp-content/uploads/2022/11/315828400_513874730801984_9086113377749613875_n.jpg?resize=880%2C564&ssl=1)
နိုဝင်ဘာ ၁၀ရက်ကလည်း စစ်ကောင်စီတပ်က ပုဏ္ဏားကျွန်းမြို့နယ် ဆင်အင်းကြီးရွာကို လေကြောင်းမှတိုက်ခိုက်ခြင်း၊ လက်နက်ကြီးဖြင့် ပစ်ခတ်ခြင်း၊ ရွာကိုမီးရှို့ခြင်းပြုလုပ်ခဲ့ရာ စစ်ကောင်စီတပ်လက်ချက်ကြောင့် ဆင်အင်းကြီးဒေသခံ ၉ဦးထက်မနည်း အသက်ဆုံးရှုံးခဲ့ရပြီး အခြားကျေးရွာများမှ ပြည်သူများလည်း သေဆုံးထိခိုက်မှုရှိခဲ့သည်။
![ထွက်ပြေးတိမ်းရှောင်နေကြရသော ပုဏ္ဏကျွန်းပြည်သူများ၊ ဓာတ်ပုံ - BNA](https://i0.wp.com/www.ludunwayoo.com/wp-content/uploads/2022/11/315302360_513874487468675_8804515081515968352_n.jpg?resize=777%2C485&ssl=1)
ယမန်နေ့ (နိုဝင်ဘာ ၁၅ရက်)ကလည်း စစ်ကောင်စီ တပ် လက်နက်ကြီး ပစ်ခတ်၍ ပုဏ္ဏားကျွန်းမြို့နယ် ကျွန်းတောင်ရွာမှ အမျိုးသားတစ်ဦး ဒဏ်ရာရရှိခဲ့ကြောင်း ရခိုင်သတင်းဌာန BNAက ဖော်ပြသည်။ ထို့ပြင် နိုဝင်ဘာ ၁၂ရက်ကလည်း ပုဏ္ဏားကျွန်းမြို့နယ် တန်းခိုးရွာကို စစ်ကောင်စီတပ်က ဒရုန်းဖြင့် ပစ်ခတ်ပြီး ကျေးရွာအတွင်း ဝင်လာ၍ ရွာလုံးကျွတ်ထွက်ပြေးတိမ်းရှောင်ခဲ့ကြရသည်ဟု BNA သတင်း၌ တွေ့ရသည်။
![ထွက်ပြေးတိမ်းရှောင်နေကြရသော ပုဏ္ဏကျွန်းပြည်သူများ၊ ဓာတ်ပုံ - BNA](https://i0.wp.com/www.ludunwayoo.com/wp-content/uploads/2022/11/315112147_513874490802008_6180839148368870811_n.jpg?resize=728%2C467&ssl=1)
စစ်ကောင်စီတပ်၏ လက်နက်ကြီး ပစ်ခတ်ခြင်း၊ လေကြောင်းတိုက်ခိုက်ခြင်း၊ အရပ်သားများအပေါ် ပစ်မှတ်ထားခြင်းကြောင့် ပုဏ္ဏားကျွန်းတွင် ပြည်သူအများအပြား စစ်ဘေးတိမ်းရှောင်နေကြရသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)