ဒီနေ့မနက်ပိုင်း မန္တလေး၊ မဟာအောင်မြေမြို့နယ်၊ မြတောင်ကျောင်းတိုက်အနီး ဗုံးပေါက်ကွဲရာ ကျောက်သမား ၁ ဦးသေဆုံးသွားတယ်လို့ ဒေသခံတွေကပြောပါတယ်။
ပေါက်ကွဲမှုဖြစ်တဲ့နေရာဟာ ၃၅ လမ်း ၊ ၈၅ လမ်းနဲ့ ၈၆ လမ်းကြားမှာဖြစ်ပါတယ်။
အဲဒီ လမ်းကို ဒီမနက်ပိုင်း စစ်ကောင်စီ မန္တလေးတိုင်းဝန်ကြီးချုပ်ယာဉ်တန်းဖြတ်သန်းဖို့ရှိတဲ့အတွက် လုံခြုံရေးချထားတဲ့ကြားကနေ ပေါက်ကွဲမှုဖြစ်တာလို့သိရပါတယ်။
ပေါက်ကွဲမှုကြောင့် လမ်းဘေးဆိုင်မှာ ထိုင်နေသူ အသက် ၆၀ အရွယ် အမျိုးသား ဗုံးစမှန်ပြီး သေဆုံးသွားသလို လမ်းဘေးရပ်ထားတဲ့ကားလည်း ထိခိုက်သွားပါတယ်။
သေဆုံးသူဟာ အရပ်သားကျောက်သမားဖြစ်တယ်လို့သိရပါတယ်။
ဗုံးပေါက်ပြီးနောက် စစ်ကောင်စီတပ်ဖွဲ့ဝင် အင်အား ၂၀ ကျော်ဟာ လမ်းတလျောက်ဖြတ်သန်းသွားလာသူတွေကို စောင့်ကြည့်စစ်ဆေးတာတွေလုပ်ခဲ့ပါတယ်။
